Willemstad, Sèptèmber, 2018 – Si únikamente e preparashonnan ta indikativo, e edishon di CIBC First Caribbean ‘Walk for the Cure’ di e aña aki, e esfuerso mas grandi den region pa rekoudá fondo kontra kanser, ta pinta di kibra un rèkert nobo e aña aki.

E komishonnan organisadó di e diferente kaminatanan ta reuniendo i planiando, ku vários aktividat pa  rekoudá fondo den e 17 teritorionan den Karibe Ingles i Ulandes kaminda CIBC FirstCaribbean ta operá. E komishonnan ta drùk preparando ku embolbimentu di partnernan regional i lokal meskos ku otro partner karitativo di ‘Walk for the Cure 2018’ E akshon fenomenal pa rekoudá fondo pa kuido di kanser i konsenshi tokante di e malesa a generá riba USD$ 1 mion den patrosinio i donashon durante di e seis añanan tras di lomba. Manera kos ta pinta e montante aki lo oumentá supstansialmente na fin di e kaminatanan i diferente otro aktividatnan e aña aki.

“Nos ta sumamente entusiasmá ku e ‘Walk for the Cure” di e aña aki.  Definitivamente tin un bon ‘vibe’ den henter region miéntras nos ta prepará pa un periodo eksitante” e ‘Walk Co-Chair’ i Managing Director Retail and Business Banking, Mark St. Hill a bisa. El a añadí ku e banko ta “partikularmente kontentu ku Anguilla, British Virgin Islands, Dominica, Sint Maarten i Turks and Caicos, kendenan aña pasá mester a kanselá nan kaminata debí na e desaster kousá pa e orkannan Irma i Maria, no opstante e echo ku nan no ta kompletamente riba pia, ta profundamente envolví i ta kla pa partisipá kompletamente e aña aki.”

Managing Director, Cards, & Customer Relationship Management i Co-Chair, Trevor Torzsas, ta mira ku espektativa pa e partisipashon di tur teritorio na e kaminata di e aña aki.  “Nos ta entusiasmá ku nos staf i klientenan riba islanan afektá a rekuperá te ku nan ta partisipá na e inisiativa aki ku ta destiná pa salba bida. “Torzas a bisa.

El a añadí ku e timnan ta hasiendo lo máksimo pa pèrkurá ku e aña aki e fondonan rekoudá lo kibra rèkertnan nobo.  “Mi sa ku nos patrosinadónan ta entusiasmá pa traha ku nos atrobe aña aki i nos ta spera di yama bon bini na mas patrosinadó i sostenedó tantu regional komo lokal den nos krusada kontra di kanser”

“Mi ta sumamente orguyoso di tur e boluntarionan na CIBC FirstCaribbean ku a hasi e inisiativa aki krese di apénas 2.000 kanadó na 2012 pa 3000 den 2017.  Nos ta spera ku un kantidat rèkert lo djòin nos I partisipá na e vários kaminatanan e aña aki,” Sr. Torzas a bisa.

“Nos tim di CIBC FirstCaribbean na Kòrsou ta hopi entusiasmá ku e edishon di e aña aki di ‘Walk for the Cure’.  Nos a lansa nos rekoudashon di fondo ku un ‘TeeOff’ ora ku nos a tene nos ‘Golf for the Cure’ na mei último.  Nos ta invitá nos komunidat pa djòin nos den e aktividatnan pa rekoudá fondo den kuadro di e edishon di e aña aki di ‘Walk for the Cure’ i e kaminata mes dia 20 di òktober próksimo”   Country Manager CIBC FirstCaribbean na Kòrsou, Edward Pietersz a bisa.

E aña aki e kaminatanan pa rekoudá fondo lo ta repartí riba wikèntnan den sèptèmber i òktober riba e vários teritorionan enbes di tuma lugá den e promé wikènt di Òktober  manera ta kustumber. E kambio aki ta debí na wer no predesibel den nos region durante di e tempu aki di aña.

E banko, no opstante e kontra tempunan kousá pa mal wer aña pasá, pero danki na e trabou duru di gran kantidat di empleadonan di banko i boluntarionan, den koperashon ku vários organisashon di kuido di kanser  i mas di 160 spònser korporativo, a logra generá mas di USD$ 450.000 aña pasá.

Algun mil hende a subi kaya, prinsipalmente durante di e promé wikènt di òktober, bistí ku e shirt blanku i ros pa kana i kore pa krea konsenshi pa e diferente tipo di kanser i e impakto ku esaki tin riba e famianan. Tur loke generá ta bai pa duna asistensia, kuido i sosten na pashèntnan di kanser i nan famia banda di krea konsenshi pa medio di kampañanan edukativo den henter e region.  E fondo ta pa yuda tambe vários organisashon asistí den kompra i mantenshon di ekiponan usá pa diagnostiká i trata pashèntnan ku kanser.