WILLEMSTAD 10 di desèmber 2017– Un skol den nesesidat na Kòrsou ta benefisiá di e generosidat di un otro skol na Hulanda, ku tin demasiado muebel. Ta trata di e skol básiko Morgenster na Sleeuwijk ku resientemente a hasi un donashon di no menos ku 450 muebel kasi nobo (stul i mesa) na e skol pa enseñansa di fundeshi Sint Margaretha College na Kòrsou. CIBC FirstCaribbean a asistí ku transporte di e mobilario di Europa pa Karibe.

Bert i Willemien Ruiter, ámbos maestro di skol penshoná i bibá na Hulanda, a kordiná e proyekto. Tur esfuerso a yega na un bunita kulminashon ora ku a habri e container den kua e muebelnan tabata i e muchanan eksitá di Sint Margaretha College por a tira un promé bistaso riba nan muebelnan nobo pa skol.

Skolnan kombiná

E muebelnan a bira disponibel ora integrashon di Morgenster ku otro skol, segun un konsepto nobo di skolnan básiko kombiná na Hulanda, a nifiká ku e muebelnan ku nan tabatin ya no tabata nesesario. Luna pasá, mas o menos 20 boluntario a stiwa un container di 40 pia ku e mobilario i otro material útil pa skol. Fundashon Help de Schoolkinderen van Curaçao a kordiná e transporte, riba petishon di e Asosiashon di Mayor- i Maestronan di Sint Margaretha College. E fundashon akí a yega di kordiná diferente donashon asinakí di skolnan na Hulanda pa skolnan na Kòrsou. Saliendo for di Rotterdam, e barku a tuma kasi un luna pa yega Kòrsou.

Ora a aserká CIBC FirstCaribbean pa yuda ku e transporte, e banko tabata kla pa koperá, komprondiendo e balor di lokal di skol ku ta inspirá i e goso ku esaki ta duna e mucha ku ta haña edukashon ei den. “Nos ta kontentu di por kontribuí na e inisiativa akí”, Lysaira Ortela, kende ta e Marketing Manager di CIBC FirstCaribbean Curaçao, ta bisa. “Banda di e echo ku e akshon hopi noble akí ta kombiná esfuerso di vários partido pa logra algu hopi esenshal – esta: un ambiente edukashonal ku ta inspirá, nos kurason a yena ku satisfakshon ora nos a mira e goso riba e karanan di e muchanan ora nan a mira e muebelnan. Ta algu ku a alegrá nos karanan tambe!”

Elogio

Ortela ta añadí ku “nos ta elogiá señor i señora Ruiter, e skol básiko na Sleeuwijk, Fundashon Help de Schoolkinderen van Curaçao i e Asosiashon di Mayor- i Maestronan pa e proyekto fantástiko akí. CIBC FirstCaribbean ta enkantá di ta parti di esaki.”