Willemstad 8 di mart 2018 Willemstad- CIBC FirstCaribbean na okashon di selebrashon di Dia Internashonal di Hende Muhé 2018 a honrá Fundashon Mami Sa i su partisipantenan debí ku nan ta ehèmpel bibu di hendenan muhé ku riba base diario ta  pusha pa progreso di nan mes i bienestar di nan yunan. E banko su Chief Executive Officer Gary Brown a elogiá e kontribushon ekselente di e hende muhénan fenomenal na kresementu di e banko.

“E partisipashon aktivo di hendenan muhé den tur aspekto di bida- sea ta gobièrnu, negoshi, edukashon, teknologia of deporte- ta un un parti integral di éksito di nos sosiedat.  CIBC FirstCaribbean no ta un eksepshon!  Nos organisashon ta sigui krese danki na  liderazgo sólido i sosten di nos empleadonan femenino.  Nos no por gradisí bo sufisiente pa bo sosten ku ta sigurá ku nos negoshi ta sigui ta respetá i fuerte awe,”  Brown a bisa den un mensahe na su staf.

E banko a tuma e oportunidat pa sostené e trabou balioso ku e fundashon ta hasi pa mamanan soltero i nan yunan.  E partisipantenan a risibí tambe un muestra di enkurashamentu di e banko na e okashon aki. CIBC FirstCaribbean ta selebrá Dia Internashonal di Hende demonstrando di e forma aki su kompromiso ku desaroyo di hende muhé no únikamente den banko pero tambe den nos komunidat. E tema di Dia Internashonal di Hende Muhé e aña aki ta #PressforProgress, ku ta enfatisá e importansia pa igualdat di género.  Ta un gritu pa promoshon, aktivismo i sosten ora ta trata e kousa di hende muhé rònt mundu.

Fundashon Mami Sa, a keda funda pa Sra. Marion van den Aardweg, ku yudansa di hendenan manera Sra. Mila Palm.  Diariamente e fundashon ta dediká tempu, energia i rekurso pa yuda mamanan soltero den edat entre 21 pa 28 aña, pa bira resistente i kapas pa dil ku retonan di tur dia inkluso kria nan yunan.  Aktualmente tin 9 partisipante ku ta partisipá na e diferente programanan pa nan bira asertivo, responsabel i kla pa sigui desaroyá nan kapasidat i buska trabou of bira empresario riba nan mes.

Lysaira Ortela di CIBC FirstCaribbean a bisa:  “Pa CIBC FirstCaribbean ta un plaser pa por honrá e trabou importante ku Fundashon Mami Sa i e partisipashon aktivo di su partisipantenan den e programa.  Mami Sa ta un ehèmpel di kon nos por empoderá hende muhé den nos komunidat direkshon igualdat di género.  Inisiativanan manera Mami Sa ta wesu di lomba pa fortifiká hende muhénan individual pero tambe promové bienestar, oumentá  e siudadanonan sano i desaroyá un komunidat ku mentalidat empresarial.”