, 24 di òktober 2016 – Riba djaweps 20 di òktober 2016 CIBC FirstCaribbean a habri ofisialmente e portanan di su sukursal na Tanki Flip Aruba, ku e promesa di kontinuá su kompromiso na e klientenan den Karibe Hulandes i en partikular e komunidat di Aruba. Na e seremonia a asistí Su Ekselensia Gobernador Interino Señora Alicia Angela (Ella) Tromp-Yarzagaray, Direktor Ehekutivo di CIBC FirstCaribbean, Señor Gary Brown, Direktor General di Retail i Business Banking, Señor Mark St. Hill, Direktor General di Caribe Hulandes, Señor Pim van der Burg i otro alto funshonario di e banko, staf di Aruba, vários dignatario di Aruba i invitadonan.

E apertura di e sukursal moderno, ta ofresé un variedat amplio di servisionan na e klientenan Platinum, Wealth Management i Corporate Banking. E edifisio di 2 piso situá na Tanki Flip 14 A-B, den serkania di e bario di Noord, ta konta ku un entrada moderno, ekipá ku 2 kahero, espasionan grandi pa reunionnan konfidensial, un sistema interaktivo di IT pa “mobile banking” i 3 bankomátiko. E karakterístikanan di e sukursal ta basa riba e estilo moderno di CIBC FirstCaribbean ku ta enfoká den maksimalisá e interakshon di e kliente ku e staf miéntras ku lo pone e último teknologia den nan alkanse.

E banko ya kaba ta konosí den e merkado Karibense Hulandes dor di su ofisinanan na Aruba, Kòrsou y Sint Maarten, inkluyendo un ofisina di representashon ku a wòrdu establesí na 2015 na Aruba i un sentro finansiero ultra moderno ku a wòrdu habri resientemente na Sint Maarten. Direktor General di Karibe Hulandes, señor Pim van der Burg, a duna e ekspanshon di e banko un bon bini i ta spera di por fortalesa e “brand” di e banko riba e isla di Aruba, su palabranan: “Nos ta presente den e merkado Hulandes Karibense pa medio di ofisinanan na Kòrsou i Sint Maarten. Despues di eksplorá e merkado, danki na nos ofisina representativo, nos a disidí di tuma e siguiente paso i ekspandé nos presensia. Esaki ta un merkado cu tin gran potensial i e sukursal prinsipal lo duna e kalidat di servisio na e lista kresiente di kliente riba e isla di Aruba.” Señor Mark St. Hill, Director General di Retail i Business Banking a deskribí e kompromiso for di CIBC FirstCaribbean na e komunidat di Aruba dor di bisa: “Ora nos habri nos portanan na boso nos klientenan, nos ta di un forma, invitando boso den nos hogar i nos lo kontinuá invertí pa krea espasionan bankario estetikamente agradabel, moderno i konfortabel unda cu boso lo sinti goso pa ta parti di nos famia. Nos ta konfidente ku nos tim, guia dor di señor Giovanni Atencio, lo duna boso e servisio insuperabel na Aruba. E sukursal ta lokalisá na Tanki Flip 14 A-B, banda di e rotònde di Tanki Flip, unda tin amplio espasio di parker disponibel. Klientenan ta bon bini pa bishita e sukursal unda ku un personal profeshonal i amigabel ta kla pa risibí nan.