Ku orguyo Curaçao North Sea Jazz ta anunsiá Chris Brown pa su di 7 edishon. E kantante/rapper Merikano lo klousurá djabièrnè dia 2 di sèptèmber riba stage Sam Cooke.

Chris Brown a marka historia ku su promé single Run It! dor di logra e puesto di mas altu riba BillBoard. For di e tempu ei Chris Brown a krese i bira un di e artistanan merikano mas popular i a bende miones di disko rònt mundu. Tambe e la gana diferente premio, entre kua un Grammy, American Music Awards i BET Awards i a konsentrá tambe riba un karera komo aktor. Den 2015 Chris Brown a saka su di 7 disko, Royalty; i e mesun aña ei e la saka un disko ku rapper Tyga.

Royalty ta su di 6 hit number 1 riba BillBoard R&B/Hip-Hop chart. No solamente e piesa a sali number 1 riba listanan di R&B, pero tambe number 2 riba lista di Diskonan mas bendí i posishon number 3 den BillBoard 200. Den un siman di tempu Royalty a logra benta di mas haltu, for di tempu di F.A.M.E. den 2011. I pa di shete (7) biaha ku Chris Brown ta logra tòp dies di BillBoard 200, den e siman ku e la saka su disko.