Willemstad, Djabièrnè 12 di desèmber pa 9or di anochi Teatro Luna Blou ta presentá Chikungunya, un komedia skibi i dirigí pa Percey “Boskwiri” Benita. Mug, un hòmber ku ta pretendé di por haña kualke dama ku e ta deseá, ya pa dos aña kaba tin un problema serio. E no por kumpli manera mester ta ku su señora esposa i su dos by side nan. Awor ku tin e epidemia di Chikungunya, Mug ta mas prekupá ainda, tur dos di su by side nan ta haña “Chikungunya”. E ta sigui konsehonan di “Dina Jaro”, pero nan no ta yuda. Nan barika ta sigui krese dor di Chikungunya i Mug no sa kiko e hasi. Ta kiko e Chikungunya ta hasiendo ku su damsnan? Nan ta logra yega hospital pero hospital kompletu ta plat. Zuster nan i broeder nan ta malu na kas ku Chikungunya. Ta kon ta hasi awor? Den e obra Percey “Boskwiri” Benita ta trese un situashon aktual den nos komunidat den un forma kómiko dilanti. Pero alabes e ta buta na atenshon di pueblo kon pa prevení esaki. “Chikungunya” ta un komedia ku ta garantisá ku públiko lo hari te yora.  E primisia di Chikungunya ta 12 di desèmber pa 9or di anochi na Teatro Luna Blou. Siguiente funshon ta djadumingu 14 desèmber pa 8or di anochi. Pasa kumpra bo karchi awe mes na Teatro Luna Blou, Time to Time (Saliña) òf na Pompstation Sta. Maria pa solamente 27,50 i si bo tin bo Membercard ta 25,00. Pa mas informashon bishita nos página web : www.lunablou.com. Por yama Teatro Luna Blou na 462-2209 òf Facebook Page: Teatro Luna Blou & La Tentashon .