Stichting Epilepsie Aruba ta sigui activo den encuentronan di conscientisacion

ORANJESTAD, Aruba – 16 di november 2015: Regularmente ta sosode accidentenan di auto cu consecuencianan serio pa un of mas envolvi. Trauma na celebro por ta un di nan y den e caso ey despues di tempo e persona por haya epilepsia a consecuencia di e accidente. P’esey Stichting Epilepsie Aruba, cu tin como meta pa duna informacion riba e enfermedad Epilepsia, a dicidi pa tene un anochi di informacion riba e tema aki. E encuentro ta tuma luga diaranson awor dia 18 di November 2015 cuminsando for di 7’or te cu 9’or di anochi na Cas di Cultura. Tur hende ta bonbini, entrada ta gratis.

Lo tin tres orador, den persona di Eugene Maduro di Departamento di Salubridad Publico cu lo duna informacion riba e cantidad di accidente di auto den e ultimo añanan cu daño serio na cabes (celebro) di e victimanan. Tambe lo hiba palabra Gijs de Rooy cu tin un yiu di seis aña cu tabata envolvi den un accidente di auto pisa na Aruba, tempo e tabatin seis luna. Despues di tempo e mucha aki a haya epilepsia hopi pisa y e tata lo splica con e mayornan a handle cu e asunto serio aki. E ultimo orador lo ta e neurologo Dr. Rafael Gonzalez cu lo elabora riba e trato di epilepsia despues di trauma na celebro cu den mayoria di caso ta sosode despues di accidente serio di auto. A funda Stichting Epilepsie Aruba na aña 2007 cu e meta pa conscientisa comunidad riba e enfermedad, pasobra no tawata existi un organisacion unda e pashent y su famia por a haya informacion riba e tereno aki cu tur su consecuencianan. Cu ayudo di entre otro dokter y otro personanan activo riba epilepsia, e fundacion riba un base regular ta tene anochi di informacion cu charlanan riba e enfermedad aki.

Dos biaha pa aña ta purba organisa un lectura informativo, dirigi na tur esunnan cu ta biba cu epilepsia. Tambe esaki ta un oportunidad pa haya sa cuanto hende ta biba cu epilepsia na Aruba. Miyones di hende na mundo ta sufri di epilepsia. Tin indicacion cu un promedio di 10% di e poblacion ta sufri di epilepsia y esey ta nifica pa Aruba un cantidad di 10 mil persona lo haya un atake di epilepsia den nan bida. Banda di esaki tin entre 3 mil pa 5 mil persona cu ta bay dokter cu ta bisa cu nan por tin epilepsia. Internacionalmente ta kere cu 1 riba cada 100 hende por haya un atake di epilepsia den nan bida y p’esey ta hopi importante pa conscientisa nos comunidad riba e enfermedad aki. Pa cualkier informacion por tuma contacto cu Stichting Epilepsia Aruba via email epilepsiearuba@gmail.com.