WILLEMSTAD — E siman aki, chairman di AVA Airways Sr. Olivier Arrindell, a hasi un bishita ofisial serka Parlamentario Hensley Koeiman di Partido MAN. Tambe tabata presente Presidente di e partido polítiko, Sr. Gassan Dannawi. Durante di e enkuentro aki, Sr. Arrindell a duna un splikashon ekstenso di e plan ku e kompania aki tini pa Kòrsou. Sr. Arrindell a mustra kon riba invitashon di Sr. Giovanni Atalita ku a tope na Jamaica na sèptèmber 2013, a invit’é pa bini Kòrsou ku e proyekto aki, despues ku DAE a dal su porta sera i manda mas ku 300 hende kas. Chairman di AVA Airways a mustra di e impakto ekonómiko ku binimentu di un kompania di aviashon manera AVA na Kòrsou lo tini. A para riba e diferente rutanan i destinashonnan ku e kompania lo bai bula, aportando pa trese mas turista Kòrsou. Ta konosí ku na e momentunan aki desempleo aki na Kòrsou ta 13%, siendo ku den hopi otro pais e ta banda di 6%, miéntras ku bou di hubentut esaki ta 37% i ta hustamente den esaki AVA Airways ke duna un aporte dor di bini ku un proyekto di aviashon nobo, moderno pa krea trabou pa yunan di Kòrsou. Na e momentunan aki, AVA Airways ta pendiente pa risibí konforme lei su pèrmit ekonómiko, pa asina ei e por kuminsá ku e proseso di akreditashon di avionnan ku den e kaso aki lo ta Airbus 319/20 pa destinashon leu i Q 400 pa destinashonnan kòrtiku. AVA Airways tei pa pueblo di Kòrsou. Konforme e businessplan den aña 3 bai ariba, AVA Airways lo bai hasi uso di avion Bombardier C 100. E speransa di AVA Airways ta ku mas pronto posibel nan por keda kla ku tur dokumento, pa asina ei por kuminsá ku e proseso pa tuma hende na trabou.