Diadomingo 15 di november

ORANJESTAD, Aruba -November 2015: Control, nutricion, movecion, un estilo di bida saludabel y conscientisacion pa cu e enfermedad cronico diabetes ta central durante di luna di november. E Centro pa Diabetico na IMSAN semper ta para cla pa asisti tur pashent pa medio di nan “carousel diabetico” cu servicio, tratamento y consehonan.

Plataforma Promocion di Salud ta apoya e actividadnan di Centro Diabetico ubica na IMSan ya cu banda di atende diabeticonan y tambe ta duna servicio di diálisis tambe ta miembro activo di e Plataforma. Prevencion ta bay man den man cu información y educación di e diabético su famia pero tambe di nos comunidad.

Pa subraya e importancia di envolvimento di parti di henter famia den e tratamento y cuido cu e pashent diabetico en general, for di e caso miho controla te cu e pashent cu ta sufri di efectonan severo di diabetes, IMSAN ta organisa un Diabetes Family Fun Day. E evento aki ta tuma luga riba diadomingo 15 di november for di 1or pa 5’or di atardi riba e parking lot di IMSAN.

Dietista Clarita Bryson ta comparti algun detaye di e programa. Durante di e family fun day lo tin control di pia di personanan cu tin diabetes, y control di sucu y presion pa e publico general. IMSAN ta conta cu diferente partner, incluyendo Fundacion Movemento ta Bida cu ehercisio pa hende grandi; y Santa Rosa cu informacion tocante plantamento y cuido di mata di fruta y berdura.

E dietistanan di IMSAN lo presenta un serie di dushi snack y bebida saludabel cu nan mes ta preparando, combina cu hopi informacion general y con pa traha e snacknan aki na cas. Tambe lo tin un quiz Diabetico pa na un forma dibertido “test” e conocemento di e bishitantenan na e family day.

Entretenimento pa e muchanan no ta haci falta, y lo inclui un “dino jump”.

Centro pa Diabetico

E Centro pa Diabetico di IMSAN ta ricibi tur pashent di Diabetes cu braza habri pa informacion y tratamento. E pashent no mester di un verwijsbrief y por simplemente bishita e centro of tuma contacto cu nan na telefon 5248833 pa haci un afspraak.

Dietista Adelita Henriette ta splica cu e prome paso ta pa un control general cerca e enfermero y un consulta cu e dietista y despues di un tempo of si ta necesario inmediatamente ta pidi un cita cu e podotherapeut. E podotherapeut ta check e pashent y tambe ta determina si ta necesario pa un miho cuido di pia, si e pashent ta wordo invita pa bin IMSAN un biaha den seis siman pa un pedicure medico.

E carousel diabetico tin cinco aña den funcionamento y ta wak pashent tur dia for di 8’or di mainta pa 4’or di atardi. Usualmente pashentnan ta bishita IMSAN cada tres luna pa un control y tin mas of menos 800 pashent ta bishita IMSAN. Semper ta saca mas tempo pa casonan complica pa asina yuda e pashent mas lihe posibel.

E funcion primordial di e Centro pa Diabetico ta yudansa pa cu lifestyle. E diabetico mester tin atencion pa su nutricion, pa movecion, control di salud y descanso apropia. E persona hopi biaha mester haci cambionan grandi den su estilo di bida pa preveni complicacionnan despues y IMSAN ta brinda e guia cu e pashent mester.

Loke mas ta resalta den pashentnan ta e cambionan cu nan mester haci den nan forma di come y si esey ta bao di control generalmente pashent ta bay bon, Henriette ta subraya. E prome paso ta pa haci un afspraak y bishita e Centro di Diabetes, despues tur cos ta control.