Willemstad Yuni 2018 – A toka honor na Minister di Maneho di Gobernashon, Planifikashon i Servisio Públiko, Sr. Armin Konket i Minister enkarga ku Desaroyo Ekonómiko, Sr. Steven Martina pa hasi apertura di e sentro komersial Celia Building, un soño di e empresario yu di Kòrsou Rignald “Niño” Castillo ku a bira realidat. Djaluna último a tuma luga apertura di Celia Building ku ta situa na Retònde di Palu Blanku. Niño Castillo a dedika e edifisio aki, den kua tambe ta bin e ofisina nobo nobo di Autorijschool Rapido, na su mama defuntu, Celia. Celia Building ta un sentro ku ta kas pa varios mas empresa na un punto sentral di Kòrsou. For di aki Autorijschool Rapido, den un fasilidat modèrno lo sirbi tur esnan ku ke logra nan reibeweis awor fasilidat kompletamente komputarisá pa siña e parti teoretiko afin ku bo logra bo reibeweis.

Sr. Castillo a hasi uso di e oportunidat tambe pa gradisí algun persona kendenan tabata importante den eksito di Autorijschool Rapido durante di e último 35 aña di e intituto di formashon pa shòfurnan bon ekipá ku konosementu di regalanan i ku ta stur na un responsabel riba kaminda. Celia Building ta kulminashon di un soño ku Niño semper a kana kuné. Realisashon di Celia Building den e tempu aki ta un muestra di konfiansa den Kòrsou i su futuro.

E historial di autorijschool Rapido mester ta un inspirashon pa kada prospekto empresario.

Na 1982 Niño Castillo, despues di laborá na un otro rijschool, a hañ’e presentá ku e realidat ku e mester bira un empresario di un dia pa otro. Danki na e.o. Sr. Pedro Paulina (q.e.p.d.), kende tabata su mèntor Wegen en Verkeer verordening i tambe lès di teoria, Niño Castillo a kuminsá duna lès di kore outo hasiendo uso di un outo di 1970. E outo no tabatin forsa pa wanta e trabou di rijschool i rápidamente Niño mester a kumpra un Nissan 120 Y, ku a kosta Nafl.5000,-, sèn ku e mester a fia pa por a kumpli ku su trabou. Ni 6 luna despues di kumpra e outo, esaki a aksidenta i Niño mester a sigui duna lès pa 2 aña largu ku un outo ku su dilanti tabata di dal. Danki na su kerido mama defuntu “Celia”, ku a para garantia, e por a kumpra un outo nobo despues di e dos añanan. Ta riba e base aki a konstruí durante di e 35 añanan ku a sigui un auto rijschool ku a bira E instituto ora ta papia di duna lès di kore vehíkulo. Autorijschool Rapido no ta djis siña bo stür pa bo slag pa asina bo haña bo rijbeweis, pero ta siña bo stür pa bo sa kon manehá un auto.

E invershon total den e Celia Building ku tin un superfisio total di 252 m2 tabata aproksimadamente Nafl. 450.000. Finansiamentu tabata posibel danki na RBC Bank. Celia Building ta brinda espasio amplio na 5 empresa i tin amplio luga di parker. Un i tur ta keda kordialmente invita pa pasa hasi e negoshinan den Celia Building un bishita i e.o. sera konosi ku e fasilidat di instrukshon modèrno di Autorijschool Rapido.