Aruba ta di fiesta mirando cu otro aña nos ta celebra 30 aña di nos status aparte y tambe 40 aña di nos Himno y Bandera, pero dia 15 di november Aruba ta celebra 60 aña di existencia di e simbolo di nos identidad, cual ta nos Escudo. E tabata un proceso cu a inicia dia 27 di maart 1953 unda e tempo ey Gobierno a anuncia un concurso pa yega na e escudo di Aruba. A dura 2 aña y mey pa por a yega na e diseño aki unda 15 di november 1955 Aruba a conoce oficialmente su escudo.

Minister Otmar Oduber den su encuentro semanal cu prensa a habri un siman positivo y a comenta cu esaki ta un bon momento pa nos tur cu ta biba riba e pida baranca aki pa realisa e importancia di e identidad nan aki cu ta uni nos como nacion, cu ta haci nos como un isla chikito, fuerte, unda den mundo nos ta reconoci pa e exitonan grandi cosecha. E mandatario ta bisa: “Esaki ta posibel a base di principionan y descendencia fuerte cu nos tin cu Aruba a sa di traspasa di generacion pa generacion por medio di e simbolonan importante aki.”

Kier duna nos Escudo e balor cu e merece y a percura pa un concurso cu ya caba ta tumando luga na scolnan basico tur rond di nos isla. E concurso aki ta duna nos hobennan e oportunidad pa cera conoci cu cada un di e significacionnan cu tin integra den nos Escudo pero tambe na mes momento celebra e existencia di e simbolo importante aki. Minister Oduber ta agrega: “Hopi biaha a traves di nos hobennan nos ta yega na e mayornan tambe. E ta brinda un oportunidad pa e interaccion cu ta asina necesario entre mayor y yiu, y asina educa di e forma aki hopi di esunnan cu ta biba riba nos isla, cu no necesariamente ta esunnan cu a nace na Aruba pero cu a integra den e ultimo añanan den nos comunidad. Awor nan tambe ta conoce a traves di nan yiu y e lesnan cu nan ta haya na scol, e simbolonan asina importante cu cada un nos como Arubiano a nace y lanta cu ne.”

Minister Oduber ta sigui comenta cu esaki ta un inicio di celebracion di un di e balornan principal cu nos como ciudadano mester sinti den nos curason ora nos ta papia di dje. Sr. Oduber ta termina bisando: “Celebracion di 60 aña di nos escudo combina cu celebracion di 30 aña di nos status aparte y tambe 40 aña di nos Himno y Bandera ta hinca nos den un periodo di celebracion hopi importante pero mas cu tur tambe di reflexion y conscientisacion di con importante e simbolonan aki ta pa cada un di nos cu ta biba riba e pida baranca aki.”