Preparashon nan ta sigui pa e gran konsierto Pasku Glamuroso. I mas ta e artistanan ku tambe lo ta den e line up pa e gran konsierto awor dia 13 di desember den WTC selebrando 15 aña di e programa Glamur. Tur kos lo kuminsá for di 7or di anochi na e patio pafó di WTC ku músika di e grupo di gaita Ambiente Navideño. Pa 8or  di anochi parti paden den exhibition hall di WTC e espektákulo “Pasku Glamuroso” lo kuminsá. Melania van der Veen lo habri e anochi ku un selekshon bunita di kansion nan di Pasku siguí pa Jill Frans. Despues di e dos artistanan aki lo sigui Clifton End ku e grupo akapèla  Genesis ku a hasi estrago den añanan 90 ku tambe a djòin e line up di artistanan di “Pasku Glamuroso”. Lo kontinuá ku  e sekshon di moda i beyesa. I manera Backstage promotion ya a anunsiá Ced Ride lo subi esenario pa kanta su selekshon di kantikanan inolvidabel di Pasku. Despues di Ced Ride ta sigui e legendario kantante di kansion nan di Pasku ku ta Nancy Ramos i su orkesta pa promé biaha na Kòrsou ku su kolekshon di kansionnan di Pasku. Nancy lo kanta entre otro Aqui estamos otra vez, Que no me da la gana, Vuela la Paloma i muchu mas. I pa koroná obra Ced Ride lo forma duo ku Nancy Ramos riba e anochi di Pasku Glamuroso. Algu ku pa promé bes den historia lo sosodé. Tur nos artistanan lo ta riba un esenario ku efektonan di lus ku lo hinkabo den e ambiente di Pasku i tambe Eduarda de Bies di Chuki’s Dance school lo kompañá ku baile tantu nos artistanan lokal i tambe Nancy Ramos. Karchinan pa sekshon general ta kosta fl 75,- i ta optenibel na Tik Tak, Beep Beep, Mensings Caminada i Koko Loko gosieweg. Sekshon VIP a sobra algun mesa so i mester yama na 524-8838 pa kumpra bo karchi VIP. E sekshon VIP ta konsistí di un welcome drink, 3 bebida di bo propio eskoho i pa kome polenta (ayaka na fòrnu),  saté di lomitu i quiche. Tur VIP lo keda sirbí na mesa pa weiternan di The Trader. Pasku Glamuroso un konsierto inolvidabel.