Durante un enkuentro hopi animá NA Sentro Kultural Kòrsou, direktiva a duna inisio na su proyekto “Promé Paso den Muzik”. Ta trata di un proyekto pa yuda desaroyá habilidat i talentonan musikal serka nos hóbennan den bario. Via di e proyekto aki hóbennan di entre 8 pa 14 aña di edat ta haña e oportunidat, pa den grupo, risibí lès di formashon di muzik i alabes siña toka un instrumento musikal. E proyekto “Promé Paso den Muzik” a bira posibel, danki na finansiamentu i koperashon di Skanfonds,  Oranje Fonds i Fonds voor Cultuurparticipatie di Hulanda. E proyekto “Promé Paso den Muzik” ta forma parti di e proyekto “Kinderen Maken Muziek” di Hulanda ku a keda inisiá na aña 2011 na okashon di selebrashon di 40 aniversario di su Mahestat Reina Maxima. Kinderen Maken Muziek di Hulanda ta un inisiativa di Skanfonds, Oranje Fonds i Fonds voor Cultuurparticipatie. Den e promé fase di e proyekto ta bai kuminsá ku un kantidat di 175 hóben repartí den barionan di Wishi/Marchena, Tera Cora, Soto i Barber. E proyekto mes lo tin un durashon di 2 aña. Den e promé aña e hóbennan lo kuminsá ku lèsnan di formashon musikal, nan ta siña lesa noot, tambe nan lo haña les di blòkflùit i kuarta. Den e di dos aña e hóbennan lo bai hasi eskoho di e instrumento ku nan ta deseá di siña toka. E lèsnan ta na enkargo di dosentenan di Akademia di Músika Edgar Palm (CCC) i ta keda duná un biaha pa siman den e sentronan di Bario ariba menshoná. “Nos ta realmente satisfecho ku e reakshonnan ku nos a risibí di diferente mayornan den e barionan kaminda nos lo kuminsá ku e kursonan di formashon musikal. Meskos nos ta hopi agradesido na e direktiva di e sentronan di bario, ku a sostené nos ku e proyekto i ku alabes ta pone nan fasilidat disponibel pa nos por duna e lèsnan”, señor Elvio Cijntje, Presidente di Sentro Kultural Kòrsou a deklará.