Despues di 4 edishon eksitoso Curaçao Baseball Week ta haña un kontinuashon di no ménos ku 3 aña! Inisiadó i organisadó prinsipal na aña 2013, 2014, 2015 i 2016, Blue Bay Curaçao Golf & Beach Resort, ta hasi un paso patras i ta duna ku hopi orguyo i konfiansa e ‘bate’ na agensia di merkadeo i evenemento Tao Curaçao i Qube. Blue Bay lo keda envolví e añanan benidero ku CBW komo Founding & Hospitality Partner. Yen di energia, idea i motivashon nobo Tao i Qube ta tuma CBW huntu ku e inisiadó Sir Hensley ‘ BAM BAM’ Meulens. Meta final: é punto máksimo anual den beisbòl mester wòrdu elevá na un nivel mas haltu!
Blue Bay
“Tur kos a kuminsá na 2009 ora nos a traha e promé plannan pa un evenemento di beisbòl anual pa nos isla huntu ku Jair Jurrjens. Den e añanan despues e promé kòmbersashonnan a tuma lugá ku Robert Eenhoorn, Hensley Meulens i Ben Thijssen. Despues di e promé edishon na 2013 nos a ehekutá un plan di 3 aña te ku 2016. Durante e último 3 añanan e evenemento a krese i bira e espektákulo di beisbòl mas grandi di region, ku ta hala anualmente mas ku 2000 bishitante i mas ku 600 mucha partisipando na klínika. Hopi esfuerso kombiná manera: hungadó profeshonal i coachnan di Korsou, CBDF, Febeko, KNBSB, MLB i ISG.’’ segun Rogier van der Meer di Blue Bay Resort.
Danki na e kresementu enorme ku CBW a realisá, a bin ripara e potensial enorme ku ainda tin den e gran evento anual aki. Asina tantu, ku Blue Bay ta haña ku CBW ta meresé di wòrdu organisá pa spesialistanan den organisashon di evenementu. Dunando organisashon prinsipal di CWB na un agensia di evenemento ta e eskoho mas lógiko e ora ei. Nan por duna 100% di e atenshon durante henter e aña, pa hasi e éksito kolektivo ta ainda mas grandi.
‘’Nos ta orguyoso di e echo ku CBW a demostrá su balor di eksistensia riba nivel lokal i internashonal. E tempu energia i relashonnan ku nos a invertí i aden tabata di gran balor i nos no ta tuma despedida kompletu di CBW. Ku hopi pashon i felisidat nos ta anunsiá ku nos ta keda komprometé te ku 2019 komo Hospitality Partner di CBW. Hungadónan, coachnan, prensa i otronan envolví lo hospedá na Blue Bay durante e siman, ku e meta pa mantené e sentido uní. Un danki ta bai na tur ku den e añanan tras di lomba a sostené CBW i a duna nan konfiansa. Nos ta entusiasmá pa e kolaborashon nobo ku e organisashon prinsipal pero tambe ku e partnernan i spònsernan di semper, ku awor nos mes tambe ta forma parti di dje. Di parti Blue Bay i CBW lo nos anunsiá dentro di poko algun donashon ku a resultá di e fondonan rekoudá na e sena subasta di 2016.’’ segun Vincent Zrour, mènedjer komersial di Blue Bay Resort.
Tao Curaçao & Qube
Tao i Qube ta hopi honrá i orguyoso pa tuma e organisashon di CBW for di den man di Blue Bay i pa e próksimo 3 añanan sigui konstruí riba loke ya a wòrdu realisá. Na mes momentu ekspandé ku algun aktividat nobo pa atraé e nos komunidat fanátiko di besbòl mas ainda na CBW. E meta ta keda mas ku klaro pa na un manera interaktivo i ku koperashon di e gran hungadónan or eks-hungadónan profeshonal di beisbòl, hasi un kontribushon signifikante na beisbòl (hubenil) di Kòrsou. E tim ta entusiasmá pa kuminsá e kolaborashon ku e partnernan i otronan gruponan envolví, pa duna e públiko lokal i internashonal un siman espektakular i inolvidabel yen di hopi sorpresa.
#SunSeaBaseballCuraçao
“Of course I know Curaçao… from Baseball!”, tabata resientemente e reakshon di un agente polisial riba Union Square na San Francisco. Beisbòl ta un deporte popular internashonalmente pero en partikular na Estádos Unídos. Nos hungadónan mas hóben, pero tambe esnan mas madurá den e liga di Reino, ta hunga den e diferente liganan mundial, pa motibu di nan produktividat haltu, nan akshonnan impreshonante i dos semi final inolvidabel di World Baseball Classic.
Hopi hóben Estádos Unídos i nan famianan ta partisipá gustosamente na klínika di hungadó profeshonal di MLB. Nan ta dispuesto na hopi pa hasi esei i Kòrsou por hasi un bunita aporte na esaki komo isla turístiko di beisbòl. P’esei e tim ta introdusí un kolaborashon inovativo i internashonal ku KNBSB pa e próksimo 3 añanan. Meta prinsipal:
Haña fanátiko i mucha ku gusta beisbòl ku ta biba den eksterior pa bini Kòrsou i partisipá na e klínikanan di nos hungadónan profeshonal. Henter e famia por disfrutá di e diferente kosnan ku por eksperensia i partisipa na aktivididatnan, i sigur tambe e konosido “Sun, Sea & Baseball in Curaçao”.
Talentboek
Sèn, òf mihó bisá e falta di sèn, ta un di e opstákulonan mas grandi pa deportista, espesialmente esnan riba nivel amatùr. Blue Bay entre tantu a hasi kontakto ku Yvonne van Gennip (kampion di Olimpiada di Invierno), koredó di skats Hulandes i fundador di un plataforma di donashon online, www.talentboek.nl. Durante CBW e tipo di método di crowdfunding aki lo wòrdu lansá pa nos talentonan deportivo lokal tambe. Di e forma aki nan por di un manera profeshonal, i internashonal ku crowdfunding, yega na nan presupuesto finansiero pa nan metanan deportivo personal.
Ophetivo komun
Danki na e kontribushon i kompromiso di Blue Bay i tambe e kabayeronan ku ya pa hopi aña ta dediká nan mes na beisbòl manera: Eenhoorn, Ben Thijsen, Paddy Roomer i Hensley Meulens, e tim nobo por konta ku e aporte nesesario pa e transishon i organisashon ku ta sigui di CBW bai sumamente eksitoso. Pa tur esnan envolví ta un ophetivo komun ta konta: di 30 di novèmber te ku 9 di desèmber 2017, lo laga henter e pueblo disfrutá di e deporte popular aki i tambe di nos héroenan di beisbòl!