Djamars 12 di yanüari 2016 ta un dia importante den historia di aviashon sivil privá. Riba e dia aki, CATS, un empresa di yu di korsou, a firma kontrato pa apertura di filialnan na Cuba pa suministrashon di tur tipo di servisio di Aviashon General. Ku esaki, CATS ta e promé kompania na mundu ku lo operá komo Business Aviation Handling Agency (BAHA) designá na Cuba. E promé BAHA lo habri na José Martí International Airport na Havana, Cuba. Aki, CATS lo ofresé entre otro e siguiente servisionan: full service handling, servisio di VIP, kombustibel, servisio di ‘concierge’, kordinashon di pèrmit i hopi mas.

CATS ta un kompania renombrá ku 32 aña di eksperensha i ku a hunga un ròl importante den desaroyo di e sektor di aviashon sivil privá na Kòrsou. Doño i CEO Soenita Oedjaghir a guia e tim di profeshonal hoben i agente eksperenshá den desaroyo di un marka mas fuerte i a prepará nan pa nan futuro potensial. Na 2013 akshonistanan Msc. Ir. Vishal Oedjaghir i Krishna Doll-Oedjaghir i mèndedjer finansiero MBA Kyle Doll a djòin e tim i huntu nan a kuminsá ku un transishon pa ekspandé e kompania. Despues ku lokal no a logra di haña e invershonnan nesesario, CATS a dirigí su esfuersonan riba merkado internashonal. Asina e empresa a bira un multinashonal i awor e promé na mundu ku próksimamente lo habri un BAHA na Cuba. Presidente i konsehero Captain Ronald Gibbs ta premirá un kolaborashon fruktífero entre e kompanianan na Kòrsou i na Cuba. Gibbs a deklará ku kresementu di e empresa ta prinsipalmente danki na e kolaborashon intensivo entre miembronan di e tim ku hopi aña di eksperensha i e profeshonalnan hoben ku ta trese konosementu i energia nobo.

E akshonistanan di CATS ke enfatisá ku e desaroyo aki lo no tabata posibel sin e trabou duru, sostén, konfiansa i e lealtat di e tim na Kòrsou. P’esei CATS ke hasi uso di e oportunidat aki pa yama e tim di Kòrsou, konsistiendo di Viandhar Oedjaghir, Osty Moreno, Sherman Libiee, Shermaline Job, Jurgen Celestijn, Jonayly Hooi, Shudairi Rojer, Raylyn Cijntje, Gloria Naomi Apostel and Brigitte Tremus, masha masha danki.

E tim di CATS ta sigui traha inkansablemente pa kontribuí na kresementu di e sektor di aviashon sivil privá na Kòrsou. Na mes momentu e kompania ta habri su alanan riba merkado internashonal, usando su marka renombrá pa pone tantu Kòrsou komo Cuba riba mapa mundial di aviashon sivil privá.