ORANJESTAD – E organisacion renombra di e famoso Caribbean Sea Jazz Festival (CSJF) ta presenta Casibari Jazz Festival Aruba 2019 riba 20 y 21 di september awor. Fanaticonan di CSJF lo reconoce e mesun ambiente musical cu artistanan manera Michael Bremo, Robert Jeand’or, Oruba cu Reno Stebo y Tania Kross cu ta canta cu Randal Corsen.
“Mi ta sumamente impresiona cu e ayudo cu nos a ricibi di nos fanaticonan, nos sponsornan, nos amigonan bo por bisa, cu pa 12 aña tabatin CSJF den nan curason y awor ta sostene nos iniciativa nobo Casibari Jazz Festival Aruba 2019”, organisado Erik Eman ta bisa.
Manera conoci e aña aki CSJF no por sigui pa falta di subsidio. E bashi cu esaki a laga atras, tambe bou musiconan local cu ta sinti falta di un stage grandi cual nan tabata por comparti cu musiconan internacional, a inspira Eman pa bin cu un alternativa.
Eman: “Aunke mas chikito y cu menos streya internacional, Casibari Jazz Festival Aruba 2019 lo duna e publico e mesun ambiente cu artistanan riba nivel halto, cuminda y arte. E ta laga bo corda di e ambiente den e prome añanan di existencia di CSJF.”
Artistanan cu lo presenta riba diabierna 20 y diasabra 21 september ta: Tania Kross y Randal Corsen lo presenta hunto cu Dibo D y Aruban String Quartet, Tony Succar kende ta canta cu Robert Jeand’or, Antonio Bello & Friends, Count Tutu y tambe Ará Caribbean Jazz Sextet. Tambe.
Casibari Jazz Festival Aruba 2019 lo tuma luga na Casibari Rock Formation, un luga unico cu yen historia. Tin dos stage: Do it Stage & Balashi Stage. Ademas e publico por disfruta di diferente cuminda na e food court, coffee & whiskey lounge, festival di artesania y un salsa workshop.
Pa full e programa y tambe pa cumpra ticket online, bay riba casibarifestival.com. Super Food Plaza y Casibari Music Café tambe ta bende ticket. E prijs pa dia ta 25 dollar. Pa hubentud te cu 18 aña tin e prijs special di 5 florin, pero obtenibel solamente na porta y mester presenta ID.
Nos kier gradici nos sponsornan pa nan confiansa y sosten: Unoca, Aruba Airport Authority, Divi Resorts, Balashi, Super Food, De Palm Tours, CMB, Prins Bernhard Fonds, Renaissance, La Cabana, Setar, Century 21, Hertz lease, ADCTRA, Aruba Port Authorities, Divi Tamarijn-All inclusive, ISS security, Interprint Aruba, Cas di Cultura, Do it, High Performance, Puro fairtrade & C2.