AHATA ta observa riba Dia Mundial di Turismo Un total di 46.550 trahado ta traha directamente of indirectamente den turismo

ORANJESTAD, Aruba – 27 di september 2016: Siendo un di e pilarnan mas importante di nos economia pa hopi decada caba, turismo ta sigui desaroya, sigui innova y sigui progresa. Riba dia mundial di turismo ta bon pa para un rato keto na e contribucion particular di e sector pa henter economia di nos pais.

Den sentido di e contribucion na nos economia, e industria di turismo den nos GDP ta representa 4.8 biyon florin pa aña y den nos GDP ‘per capita’ e ta bon pa 44.265 florin pa aña.

E ultimo añanan, turismo ta sigui crece den cantidad di bishitante, manera por nota cu aña pasa a logra un cifra record di 1.224.900 bishitantenan “stay-over” y a conta 607.100 bishitantenan via crucero. Pa loke ta e cantidad di anochinan, esaki a acumula na 8329.6 teniendo cuenta cu e estadia averahe di cada turista cu bin Aruba ta di 6,8 dia. Si conta e turistanan yegando via avion y crucero hunto, nos ta alcansa un total di 1.832.000 bishitante den aña 2015.

Banda di e cantidad di turista yegando, e inversionnan cu e industria ta haci den e infrastructura, hotelnan, etc. tambe tin e parti di locual e turista mes ta gasta durante su estadia riba nos isla. Cifranan ta indica cu cada turista ta gasta Afl. 1604,80 na Aruba. Pa loke ta cifranan di exportacion, turismo ta representa 86.22% di nos GDP y ta 60.79%. E suma total cu turistanan ta laga atras na Aruba aña pasa ta 2.9 biyon florin.

Siendo e hotelnan algun di e dunadonan di trabou mas grandi na Aruba, claro cu e aporte di turismo na e caha di Gobierno tambe ta cuantioso. Na Belasting so, turismo ta produci 72 miyon florin pa aña, specificamente na impuesto riba estadia y 23.3 miyon pa aña na impuesto di casino. Hunto e hotel y casinonan ta aporta na 95.3 miyon florin pa aña na impuesto.

Claro cu turismo ta e dunado di trabou mas grandi na Aruba, tanto esunnan cu ta traha directamente como tambe indirectamente cu turismo. Nos Mercado laboral ta consisti di 52.000 trahado di cual den turismo ta traha directamente 13.300 empleado mientras cu indirectamente ta traha 33.250 empleado. Na tur, trahando den turismo ta 46.550 cu ta igual na 89,52% di henter e Mercado laboral di nos pais.

Na september 1965 a funda Aruba Hotel Association y na 1987 a bira Aruba Hotel and Tourism Association (AHATA), cu awendia ta conta cu 90 compania miembro. Su miembresia ta varia for di hotelnan grandi, timeshare, operadornan di tours y companianan grandi y chikito den e sector. E rol primordial di AHATA ta pa proteha, dirigi y influencia e industria turistico di Aruba dor di sigura cu sector publico ta aloca fondonan di “Room Tax” den forma apropia, ta inverti e suma aki efectivamente y ta ehecuta plannan di mercadeo den forma corecto pa aumenta “rev-par” y e suma cu cada turista ta gasta ora ta di bishita riba nos isla.