WILLEMSTAD:- Djaluna anochi maneho di Carrefour Market a invitá relashonadonan empresarial i miembronan di prensa pa selebrá nan apertura.  Aubrey Regina, direktor di e supermerkado di mas nobo na Kòrsou a inisiá e anochi gradisiendo tur invitado pa nan presensia, i mesora a rekonosé e trabou duru di nan empleadonan. Carrefour Curaçao a kumpli ku su promesa, i awe tin alrededor di 100 empleado lokal. Despues di e palabra di bon bini sr. Regina, a yama sr. Jonathan Cohen i sr. Alfredo Cohen riba esenario pa gradisí nan pa e kolaborashon tremendo ku Sambil a bin ta duna Carrefour Market. Durante di e anochi, representante di Carrefour International, sr. François Despointe tambe a hiba palabra gradisiendo komunidat di Kòrsou pa habri brasa pa e marka. Sr. Minister Gijsbertha durante di su diskurso a suprayá ku maske tin desafionan den nos ekonomia, Carrefour a empleá 100 yu di Kòrsou pa traha den e supermerkado esaki sigur ta un notisia alentador. Por último, propietarionan Sunny Khatnani i Anil Sabnani a elaborá riba e proyekto i a gradisí Gobièrnu di Kòrsou i tur distribuidor, proveedor  i partnernan stratégiko ku a hasi posibel pa e promé establesimento di Carrefour na Kòrsou bira un realidat, bisando ku ta un satisfakshon inmenso pa selebrá e apertura di Carrefour na Sambil despues di a plania e proyekto pa 2 aña largu.

Entre gritu i aplouso di invitadonan i e propio empleadonan di e supermerkado sr. Sunny Khatnani,  sr. Anil Sabnani, sr. Minister Gijsbertha, sr. François Despointe i sr. Jonathan Cohen a kòrta sinta pa ofisialisá e apertura. Mesora invitadonan a risibí e promé oportunidat di kana i eksplorá e supermerkado ku sigur ta un atkisishon fantástiko pa Kòrsou. Carrefour Market na Sambil ta habrí di djaluna pa djasabra for di 7:30 pa 20:30 i djadumingu for di 7:30 – 17:00.  Like e página di Carrefour riba Facebook i no pèrdè niun update.