WILLEMSTAD:- Finalmente e dia ku Kòrsou tabata spera! Maneho di e supermerkado ta anunsiá ku Carrefour Market lo habri su portanan djamars, dia 26 di Mart 7:30 AM. Aubrey Regina, direktor di e supermerkado di mas nobo na Kòrsou ta masha kontentu di porfin por anunsiá e fecha. “Nos ta poniendo e tokenan final na Carrefour. Henter e team tin algun dia hopi largu tras di lomba i ta na su lugá pa nos gradisí tur 90 empleado di Carrefour, tur proveedor i distribuidor ku a kana e trayekto aki huntu ku nos. Kòrsou por spera un eksperensia di kompras nobo;  produktonan di kalidat, na preisnan lokal pa tur pòtmòni. Kombiná ku nos spesialnan e kliente lo ripará ku e preisnan ta asina kumbiniente ku por yega Carrefour pa e kompras di mas chikí, te na esun di mas grandi. Lo ofresé produktonan propio (Carrefour) den tur departamentu.” Falta nèt un fin di siman mas.  Carrefour Market tin su mes entrada, via di entrada Cas Abou di Sambil. Lo ta habrí entrante djamars, dia 26 di Mart – di djaluna pa djasabra for di 7:30 pa 20:30 i djadumingu for di 7:30 – 17:00. No pèrdè niun ‘update’; scan e QR code of like e página di Carrefour riba Facebook.