WILLEMSTAD/OKT 2018– Luna di òktober ta luna di konsientisashon riba enfermedat di kanser na pechu. E luna aki Carnaval Casino ta sostené Fundashon Sinta Ros i lo ta dunando su aporte den e kolekta pa e fundashon por sigui ku nan bon trabou di konsientisá nos komunidat i di guia tur persona ku ta sufriendo bou di e kondishonnan di kanser. Carnaval Casino, ta ‘pink’ e luna aki i ta invitá su miembronan pa hasi un donashon chikitu na e fundashon.

E sostén na Fundashon Sinta Ros ta kuadra ku e filosofia di Renaissance Curaçao Resort & Casino, parti di Wind Creek Hospitality. Di akuerdo ku sra. Heidi Foendoe gerente general di e casino, “Niun donashon lo ta chikí; tur ta bon biní!”. Te hasta por benta e ‘ticket’ (tito’s) ku ta sali for di e slòtmashin ku sèn sobrá na dòler den e buzon. “Nos casino semper ke aportá na nos komunidat, i esaki ta un kousa ku e aña aki nos ke motivá tur nos miembronan pa aportá n’e’. Pa fasilitá nos miembronan, ademas di sèn kèsh por benta e tito’s(nan) tambe den e buzon. Laga nos duna Fundashon Sinta Ros un man di manera ku nan por sigui ku e bon trabou pa nos komunidat”.

Miembronan di Fundashon Sinta Ros lo ta na Carnaval Casino dianan 11 i 12 di òktober entre 8’or i 10’or di anochi pa benta di t-shirt pa e kaminata anual di e fundashon dia 13 di òktober próksimo ku tambe ta un di e maneranan ku ta rekoudá fondo pa sigui ku e trabounan. Ta invitá komunidat pa duna un sosten na Fundashon Sinta Ros i na e akshon spesial ku Carnaval Casino ta hasiendo den nan ‘pink month’.