WILLEMSTAD/NOV 2018– Djamars mainta Carnaval Casino a hasi entrega di e montante ku a keda rekoudá durante di luna di òktober na Fundashon Sinta Ros. Manera ya kaba tur hende sá, Carnaval Casino a sostené Fundashon Sinta Ros luna pasá den nan akshon pa rekoudá fondo. Di akuerdo ku Gerente General di e casino sra. Heidi Foendoe, miembronan di e casino a kontribuí grandemente. “Un di nos metanan komo siudadano korporativo ta pa yuda den e área sosial tambe; den esaki nos ta risibí sosten di nos kompania mama Wind Creek Hospitality. Ta ku hopi plaser nos ta hasi entrega di e chèk ku balor di 5,000 florin na Fundashon Sinta Ros.

Durante di e último simannan aki, personal di e casino a bisti primordialmente e koló ros komo señal di sosten na e fundashon ku a bin ta traha duru pa informá i konsientisá nos komunidat riba kanser na pechu. Miembronan di Carnaval Casino por a te hasta benta e ‘ticket’ (tito’s) ku ta sali for di e slòtmashin ku sèn sobrá na dòler den un buzon spesial ku tabata tin den e casino. Gerensia di Carnaval Casino ta gradisí nan empleadonan, komunidat di Kòrsou i tur su miembronan pa e sosten ku e Carnaval Casino ‘Pink Month’ a risibí.