ESO – Evento | Show | Otro

CARIFLIX TA GANA PRODU AWARD 2018 NA LAS VEGAS

Pabien Kòrsou! Ku hopi orguyo TeleCuraçao i UTS ta anunsiá ku Cariflix a gana e prestigioso Produ Awards Tecnología 2018 ayera na Las Vegas. CARIFLIX a ser nominá pa Produ Awards n’e ‘convention’ di Televishon i Media di mas grandi na mundu kual ta NAB (National Association of Broadcasters) i el a gana den e kategoria “Mihó proyekto teknológiko”.

Entre e nominadonan tabatin:

  • Cariflix di Karibe
  • Vlixers di El Salvador
  • TCS Go di El Salvador
  • FNC di Costa Rica por ChyronHego
  • http://Cine.ar di Primestream Argentina
  • MegaCable di Mexico
  • Fanatiz di SmartBox TV (Argentina, Mexico, Chile i Peru)

CARIFLIX ku ta un produkto ku rais firme den TeleCuraçao i UTS i a keda desaroyá dor di Streann Media. Direktor general di TeleCuraçao, sr. Hugo Lew Jen Tai i representantenan di Streann Media, a risibí e Produ Award 2018 aki durante di e NAB Show na Las Vegas. Mester bisa ku sr. Alfredo Yanes di Produ Awards a splika ku CARIFLIX ta figurá entre e grandinan di region.

Cariflix Caribbean ta un echo. Mas ku 30 produktor di Karibe awor ta afiliá na Cariflix via di GT Caribbean (GT=Great Things). Usuarion ya kaba por mira ku programanan di produktornan di Karibe a kuminsá subi Cariflix.

Den apénas 8 luna di eksistensia, Cariflix ya ta rumbo pa 100 mil downloads di kual 30 mil tur momento ta aktivo i ya tin mas di 1000 programa di upload riba Cariflix komo VOD (Video on Demand), vários kanal i tambe radionan lokal, mientras ku Cariflix ta generando un promedio di 700 mil ‘impressions’ pa luna. E aseptashon masal i éksito di Cariflix ya a redondá den dos logro impreshonante kaba: Curaçao Innovation Awards 2017 i aworakí e Produ Awards Tecnología 2018 na Las Vegas.

Spera muchu mas di Cariflix pa sigui yuda engrandesé nos produktonan lokal i entretené, informá i eduká abo unda ku bo ta. Pa mas informashon, bishitá e página di Facebook di Cariflix òf subi www.cariflix.com.

Lindomar