Caribbean Tourism Organization ta anuncia Aruba ta na di dos luga cu 15% di crecemento den aña 2015

ORANJESTAD, Aruba – 13 di maart 2016: Turismo pa Caribe ta kibrando tur record, asina Caribbean Tourism Organization (CTO) a informa siman pasa y cu a haya cobertura internacional. Cu e afirmacion aki, e organisacion Caribense di turismo ta confirma cu islanan den Caribe ta riba e lista preferi di biaheronan for di varios region, incluyendo Europa, Norte America y Sur America.

Aña pasa turismo den region Caribense a crece cu 7% y asina a alcansa no menos cu 28.7 miyon pasahero cu a yega na islanan den Caribe. Hunto nan a gasta 27 biyon Euro cu de facto ta representa 4.3% mas si compara cu locual turistanan a gasta na aña 2014 den e area di Caribe. Cu e realidad aki riba mesa, Caribbean Tourism Organization a confirma cu e region Caribense ta creciendo hopi miho compara cu tur otro pais na mundo. Tin cuater motibo dicon Caribe ta resaltando. E prome ta un crecemento impresionante den confiansa di e consumidonan, prijs abou di petroleo, mas opcion di vuelo pa Caribe y segun CTO e trabou duro cu CTO mes ta desplegando den promove e area mas. Merca ta keda e mercado di mas grandi pa Caribe, cu no menos di 14.3 miyon turista, aunke cu Europa a logra su miho aña, dor di surpasa 5 miyon turista y un crecemento di 4.2% cu ta miho den e ultimo 7 añanan.

E destinacionnan den Caribe cu mas a crece den aña 2015 ta Cuba cu 17.4% sigui na di dos luga pa Aruba cu 15%, Barbados cu 15% y Haiti cu 11% di crecemento. Pa aña 2016 tambe e pronosticonan ta mustra hopi positivo, entre 4.5% y 5.5% di crecemento den turismo pa Caribe. Pa loke ta trata turismo crucero tambe tin un crecemento den e region di 1.3% pa alcansa un total di 24.4 miyon pasahero riba crucero. Pa e aña aki CTO ta premira cu e industria di crucero lo crece entre 1% pa 2% den e region Caribense.