Willemstad- Den fin di siman tras di lomba a tuma lugar e di 3 edishon di Caribbean Tattoo Convention, e biaha aki na Holiday Beach Resort. Meskos ku añanan anterior a konta ku partisipashon di artistanan di tattoo internashonal, por a tuma nota di artistanan di Ulanda, Sürnam, UK, USA, Argentina, Venezuela i naturalmente nos propio artistanan di arte físiko. Esnan mas sobresaliente a resultá, Victor Peralta di Argentina i Emilio Gonzalez di Venezuela. Byron Jacobus di ‘Byron Tattoos’, organisadó di e Caribbean Tattoo Convention ta sumamente kontentu ku e resultadonan i e manera ku Kòrsou a bin ta apresiá e arte aki. “ Nos ke gradisí tur fanátiko di tattoo i tur esnan ku awòki a haña un apresio pa e arte i ku di un forma masal a aportá na e éksito di e terser Caribbean Tattoo Convention. Un danki na tur spònser ku a aportá, nos ta invitá un i tur keda pendiente pa otro aña”. E show di ‘suspension’, algu espektakular pa mira, na unda ku ta hinka hak spesial den e kurpa humano pa despues kologá for di kabuyanan spesial a konta ku un públiko masal riba ámbos dia. Riba fotonan athuntu por haña un impreshon di e Caribbean Tattoo Convention ku a tuma lugar fin di siman tra’i lomba.