Willemstad – Prevenshon ta e insentivo na 2019 pa Minister Suzanne Camelia-Römer, Fundashon Prevenshon i Fundashon Medisina Preventivo. E nesesidat pa prevenshon ta konta pa un i tur. Perkurá pa bo ta na tempu i ku bo ta antisipá e kehonan di bo malesa. I pa tur hende prevenshon lo tin e mesun nifikashon; esta trata na prevení un malesa mas tantu posibel.

Fundashon Prevenshon ta desmaskerá e promé señalnan i ta evitá, si por, hasta ku e malesa lo presentá kualke dia. Na 2008 esaki tabata un di e metanan importante pa lantamentu di Fundashon Prevenshon. For di e momento ei screening pa kanser na pechu i screening pa kanser na boka di matris tabata e inisiativanan ku Fundashon Prevenshon a realisá den e último dies añanan. Ku e aktividatnan aki ya a diagnostiká 233 hende muhé ku kanser na pechu promé ku nan tabata sa ku nan tin e malesa. Si, promé ku nan tabatin mester di tratamentu masha drástiko. Asina nan a sobreviví ku un bida di bon kalidat. E balor pa komunidat ta evidente.

Ku gran gratitut Fundashon Prevenshon dia 14 di desèmber último a selebrá su di 10 aniversario. Na e okashon ei profesor Herbert ‘Bob’ Pinedo a gradisí tur esnan ku a hasi lantamentu i kontinuidat di Fundashon Prevenshon posibel, muy en espesial e miembronan di personal. A para ketu na e forma positivo di e koperashon ku partnernan, e envolvimentu di komunidat, e empeño di e kolaboradornan i e sosten di esnan ku a hasi nan donashon. Ku respaldo finansiero di gobièrnu Fundashon Prevenshon a logra durabilidat di su servisionan. Den esaki e regalo di Jacob Foundation pa Fundashon Prevenshon na 2008, ofresiendo pa hospedá na Klipstraat Otrobanda durante 10 aña sin tin nodi paga hür, tabata di balor krusial.

Ya ku e espasio na Klipstraat tabata hopi limitá, dos aña kaba Fundashon Prevenshon ta en buska di un lugá mas espasioso, i aktivo ku su Plan Grandi pa e término mas largu. Huntu ku e Fundashon Medisina Preventivo, awe Fundashon Prevenshon ta anunsiá ku su búskeda pa un espasio mas apropiá den Otrobanda a duna su frutanan. Fundashon Medisina Preventivo ta brinda Fundashon Prevenshon e oportunidat pa gratuitamente realisá su plannan di prevenshon den un área mas amplio, masha atraktivo i sentral. Entrante mei 2019 Fundashon Prevenshon lo ofresé su servisionan grátis na henter e poblashon na un forma konfortabel pa kliente den su Caribbean Prevention Center na Kas Molenplein, ku ta restorando aktualmente. E sitio ta disponé di oportunidat amplio di stashonamentu i ta djis pegá ku e parada grandi di bùs na Otrobanda. Apertura di Kas Molenplein na man di Minister Camelia-Römer ta planiá den algun luna. Awe tardi e direktivanan di Fundashon Medisina Preventivo i Fundashon Prevenshon a firma e konvenio entre nan dos. E fórmula di Caribbean Prevention Center, ku konsentrashon di tur fasilidat preventivo den un organisashon, ta para modelo pa inisitativanan den henter region di Karibe. Pa mart e aña aki tin riba programa un promé bishita na gobièrnu di Martinique pa presentashon di e modelo.