Willemstad – Curaçao Airport Partners (CAP) ke mustra riba informashon sumamente inkorekto den interpretashon di kontenido di un email informativo mandá dor di CAP pa Minister di Desaroyo Ekonómiko ku ta regardá e General Aviation Center ku aktualmente ta ser desaroyá dor di CAP na Curaçao International Airport. CAP ta nenga ku e ‘quotes’ ku ta wòrdu trese en relashon ku su CEO i ku a resaltá den e artíkulo ta korekto. E artíkulo, den forma inkorekto, ta sita kontenído di e e-mail informativo ku CEO di CAP a manda pa pone enfoke riba un oportunidat spesífiko ku lamentablemente a bai pèrdí wikent ùltimo dor di retraso den realisashon di e General Aviation Center nobo, kousá dor di prosesonan atministrativo foi kontrol di CAP. CAP a plania pa finalisá e General Aviation Center pa por akomodá e bishitantenan di Curaçao North Sea Jazz Festival ku tin avionan tipo jet. Bou di ningun forma e informashon por wòrdu interpretá komo ofrese riba un manera estríkto, manera a ser insinuá den e artíkulo. CEO di Curaçao Airport Partners no a ser entrevistá dor di prensa i CAP tampoko  a manda ‘quote’ pa esakinan wòrdu publiká. Ounke CAP en berdat ta haña ku e hecho ku e General Aviation Center no tabata habrí durante e resiente festival tabata un oportunidat pèrdí, e kompania no ta opta pa bai prensa ku esaki. Es mas, CAP a establesé un relashon profeshonal i kooperativo ku Minister di Desaroyo Ekonómiko kual tin komo enfoke kontinuashon di e progreso i desaroyo di e aeropuerto, i ta distanshá su mes di e informashon inkorekto den resien publikashon den media.