Presidente di Hunta di Direktiva ke kontribuí mas na Kòrsou su aeropuerto i komunidat
Willemstad, 27 di sèptèmber 2022 ̶ Curaçao Airport Partners su Presidente nobo di Hunta di Direktiva, Sr. Fábio Russo Corrêa, kende ta alabes Direktor Ehekutivo di CCR Aeroportos, ku ta CAP su akshonista mayoritario, huntu ku e Direktor Ehekutivo nobo di CAP, Sr. Jonny Andersen, resientemente a bishitá diferente ‘stakeholder’, entre nan Minister di Tráfiko, Transporte i Planifikashon Urbano, Sr. Charles Cooper i Minister di Desaroyo Ekonómiko, Sr. Ruisandro Cijntje. E bishitanan a sirbi pa introdusí e Presidente nobo di Hunta di Direktiva, kende tabata di bishita na Kòrsou for di Brazil.
Durante e reunionnan, e lidernan akí di CAP a papia tokante e kompania su plannan pa drenta un era nobo di desaroyo i kresementu, miéntras nan ta prepará pa duna un direkshon nobo na e organisashon. Nan a indiká ku e pandemia, ku a laga CAP pasa den un periodo hopi difísil, a sirbi pa duna un perspektiva nobo, i e determinashon pa introdusí e kambionan nesesario i implementá ideanan inovativo i inisiativanan pa aeropuerto por ta mihó prepará pa futuro.
P’esei CAP a kuminsá ku un proseso stratégiko di 100 dia pa determiná un rumbo nobo pa e kompania i duna guia pa move den direkshon di su metanan pa e próksimo 5 añanan. E strategia akí ta planiá pa keda finalisá na medio novèmber 2022 i keda presentá na e Hunta di Direktiva pa aprobashon. Ora e proseso akí keda kompletá, e Presidente di e Hunta di Direktiva tin intenshon di biaha bin Kòrsou atrobe pa presentá e strategia nobo, huntu ku Sr. Andersen, na e ministernan di Tráfiko, Transporte i Planifikashon Urbano i Desaroyo Ekonómiko.
Pa sostené e strategia nobo, e Hunta di Direktiva ta planiando pa ta muchu mas enbolbí ku CAP i kontribuí bastante mas na aeropuerto di Kòrsou i e komunidat di Kòrsou. E intenshon ta pa asina surpasá loke ta rekerí konforme DOMA, e akuerdo di lisensia pa operá e aeropuerto. Por ehèmpel, e Hunta di Direktiva ke kontribuí na hasi nos aeropuerto mas akohedor, sostené desaroyo di tráfiko aéreo inkluso un oumento den transporte aéreo di karga, i tambe enfoká riba aviashon eléktriko ku mira riba sostenibilidat i futuro kresementu. Tin tambe plannan pa implementá un kampaña di merkadeo internashonal na Brazil, p’asina sostené i fortalesé turismo riba nos isla.
Esaki kiermen ku e Hunta di Direktiva ta deseá un ròl mas aktivo den desaroyo di aeropuerto, i funshoná komo un partner pa CAP. E ta nifiká tambe e komienso di un era nobo pa Kòrsou su aeropuerto, den kual nos ta ansioso pa guia e kaminda pa yega na mas avanse i un futuro briante.