Pa medio di e torneo karitativo a logra rekoudá fondo pa Stichting Tegen Kindermishandeling i CARF

Willemstad – Djasabra último a tuma lugá e promé torneo di golf karitativo di Curaçao Airport Partners. Tantu pa medio di partisipashon di sigur 27 tim di golf nashonal i internashonal, komo donashon di kompanianan lokal, a logra rekoudá 27.000 florin ku a wòrdu ofresé na e inisiativa ‘Do Blue-Stop Child Abuse Now’ di Stichting Tegen Kindermishandeling i Curaçao Animal Rights Foundation. E montante  lo sirbi e inisiativanan den nan lucha pa derecho, desaroyo sano, mehorashon i protekshon di hobennan den nos komunidat i e lucha pa derecho di animal; un kombinashon skohé ku e pensamentu ku e amor inkondishonal di animal sa tin un impakto positivo den e trayekto di e mucha abusá pa loke ta ‘healing’. E torneo karitativo ‘Curaçao Airport Partners Annual Charity Golf Tournament’ tin komo ophetivo pa  enkurashá kompanianan i organisashonan rònt Kòrsou pa konhuntamente generá fondo pa sostené inisiativanan ku ta traha na bienestar i desaroyo di komunidat. E aña aki e montante rekoudá a wòrdu  ofresé na ‘Do Blue/Stop Child abuse now!’ di Stichting Tegen Kindermishandeling i na Curaçao Animal Rights Foundation (CARF). Djasabra último 27 tim di Golf a kompetí den e torneo karitativo. E diferente tim di Golf a wòrdu di sponsor dor di kompanianan i partikular i tabata kontené partisipantenan di entre otro Kòrsou, Merka, Venezuela i Aruba. Banda di donashon ofresé dor di diferente kompania, tur tim di Golf a paga pa por partisipá i asina por a rekoudá fondo pa e fundashonnan. Tambe diferente kompania, komo gesto pa e inisiativa, a ofresé nan servisio,  konsumo, material, i regalo, p’asina realisá un evento karitativo eksitoso. E ganadornan por a gana trofeo di Golf, un Mazda, oloshi di e marka luhoso TAG HEUER, Ticket di KLM i Avianca, Kamara, Wikènt na Santa Barbara Beach & Golf Resort, Wikènt na Marriot Beach Resort & Emerald Casino, Wikènt na Hilton Hotel, kado bon pa bishitá restorant na Hilton Hotel, oloshi di Aldeasa, kado bon di Joro Boni/ Zailo/Café Barista/ i kaha di Heineken. Pues kompanianan, pa medio di e ‘Annual Charity Golf Tournament’, a sostené un inisiativa positivo i alabes por a partisipá pa gana premionan hopi interesante. Curaçao Airport Partners ta gradisí na tur kompania i partikular ku pa medio di su partisipashon, donashon òf gesto a realisá un evento karitativo inmensamente eksitoso. Durante e Award Ceremony ku a tuma lugá despues di e torneo, representantenan di ‘Do Blue-Stop Child Abuse Now’ (Stichting Tegen Kindermishandeling) i CARF a ekspresá nan gratitut na tur esnan presente: “Ta e tipo di donashonnan aki ta hasie posibel ku nos por yuda miles di mucha, hende muhé i hende homber abusá i neglishá den nos pais. Logra haña finanshamentu pa e organisashon sobrebibí ya pa hopi aña ta un lucha, pues nos ta sumamente gradisí di a risibí boso sosten”.