ORANJESTAD, Aruba – Juni 2018: Aruba Hotel and Tourism Association (AHATA) a organisa nan asamblea general pa e 90 miembronan cu ta compania den sector turistico. Durante e asamblea a presenta nan CEO nobo, Tisa LaSorte y a tene un fiesta di despedida pa Jim Hepple, kende a fungi como CEO di AHATA pa 8 aña y mey.

Tom Calame, Chairman di hunta directiva di AHATA a gradici Jim Hepple pa su añanan di dedicacion na e asociacion y na e bienestar di turismo di Aruba. E hunta y e miembronan a yama bon bini y desea exito na e CEO nobo Tisa LaSorte, cu a tuma over e responsabilidad di guia AHATA pa su siguiente nivel. Tisa LaSorte ta un yiu di tera cu a traha na Merca pa mas cu 20 aña y a regresa Aruba 9 aña pasa unda el a acumula experiencia valioso den sector turistico.

Jim Hepple ta sigui cu un carera nobo den facultad na Universidad di Aruba, y asina lo sigui apoya e industria; desaroyando e generacion nobo di empleadonan y ehecutivonan pa turismo.

Durante e programa di asamblea general, e CEO saliente, a raporta na e miembronan tocante actividadnan di e asociacion e ultimo aña. E CEO nobo a expresa cu su prome focus ta pa conoce cada miembro y scucha nan necesidadnan, cu intencion pa crea un plan pa futuro cu ta refleha obhetivo di e miembronan y cu ta sigura exito sostenibel pa e companianan den sector turistico. Tisa LaSorte su deseo ta pa e miembronan di AHATA semper keda bon informa, uni, y activo, y pa AHATA ta un asociacion fuerte cu ta defende interes sostenibel di e sector primario di empleo riba nos isla.

E asamblea general di AHATA a tuma luga na Barceló Aruba hotel. Samuel Johnson, General Manager di Barceló Aruba, a ofrece pa ta anfitrion, specialmente pa organisa e fiesta di despedida di Jim Hepple. Barceló a sigura cu e Presidente y CEO saliente ta haya un despedida bon mereci, un evento special y pa tur hende pasa un rato agradabel. AHATA ta gradici e team di Barceló Aruba pa organisa un evento inolvidabel.