Djadumingu dia 22 di novèmber próksimo presentashon di Dimitri Vegas i Dj MATTN
WILLEMSTAD – Novèmber 2015 – Kòrsou ta konosí pa solo, santu i laman, Cabana Beach Club ta kombiná tur esakinan ku músika, ambiente i bon vibrashon pa dia 22 di novèmber próksimo presentá ‘Turn Up the Beach’ ku un ‘line up’ di Dj lokal i internashonal. For di 2’or di atardi lo kuminsá krea e ambiente i Cabana Beach Club lo ta totalmente den esfera di ‘Turn Up the Beach’, aki por pensa riba un ambiente playero internashonal ku lo bai kaba te den oranan di mardugá.
DJ Alex Sargo, DJ Carlito, DJ Natsuj i DJ Alain ta skematisá pa presentá durante ‘Turn Up the Beach’ i e popular Chris Strick lo ta MC pa e festival di dia 22 di novèmber próksimo. E área di Bapor Kibrá lo vibra ku presentashon di nos Djnan lokal i lo ‘turn up’ ku presentashon di DJ Dimitri Vegas konsiderá komo e DJ number unu na mundu i sensashon femenino DJ Mattn. For di un edat relativamente hóben Dimitri Vegas a kuminsá figurá komo DJ. Despues di su presentashon den 2010 na ‘Tomorrowland’, su karera a konosé un kresementu eksplosivo, produkshon di tema ofisial pa e festival na 2010, 2012, 2013 i 2014 ta djis algun highlight. Na òktober di 2015 Dimitri Vegas (huntu ku Like Mike) a wòrdu rekonosé kome DJ number unu na mundu. Dia 22 di novèmber próksimo Dimitri Vegas lo duna un presentashon solo. Ademas di Dimitri Vegas e ‘dj fashonista’ Dj MATTN tambe lo tei. Anouk Matton ta un modelo renombrá, e’la wòrdu deskubrí dor di Dimitri Vegas durante un seshon na ‘Tomorrowland’ awor e ta un di e Djnan femenino mas solisitá tokando na Ibiza i diferente otro festival EDM. Dia 22 di novèmber próksimo Dimitri Vegas huntu ku Dj MATTN ta figurá komo e ‘international act’ di ‘Turn Up the Beach’.
Di akuerdo ku representantenan di Cabana Beach Club a tuma e oportunidat di kontribuí mesora ku un otro proyekto ku tambe lo bai hala hopi atenshon. Djasabra 19 di desèmber próksimo lo tin e promé Santa Run na Kòrsou. Fundashon ‘Di Kòrsou, Pa Kòrsou’ lo organisá e kaminata/kareda masha spesial aki ku lo tuma lugar den sentro di siudat. Di kada karchi ku wòrdu bendí di ‘Turn Up the Beach’ lo hasi un donashon di Naf. 2.50 na e proyekto Santa Run. Ku e festival aki Cabana Beach Club ta yama danki na tur esnan ku den transkurso di aña a bishitá e Beach Club pa sea ‘lunch of dinner’, ‘hang out’ òf pa akudí na e popular ‘Cabana Beach Fest’. Entrada pa ‘Turn Up the Beach’ lo ta Naf. 25.00 te ku 5’or di atardi i despues e lo bira Naf. 35.00. Dia 22 di novèmber próksimo bo ta invitá pa disfrutá di ‘Turn Up the Beach’ na Cabana Beach Club.