Willemstad- C-Post International, konforme un bon tradishon di e kompania pa entrega su kuenta anual di e aña anterior konforme e tèrmino stipulá pa entrega esaki, resientemente a entrega su kuenta anual 2013 oudita na representashon di akshonista den persona di Minister enkarga ku Tráfiko, Transporte i Planifikashon Urbano Sr. Earl Balborda. C-Post International di e forma aki ta kumpli ku un stándart ku e kompania mes a pone pa su mes pa entrega su kuenta anual na akshonista, si no ta komo e promé kompania di gobièrnu aloménos un di e promé nan. Franklin Sluis, Gerente general di C-Post International ta bisa “ Un di e ophetivonan di nos kompania ta pa nos kumplí kabalmente ku reglanan di bon gobernashon korporativo.  Ta p’esei ta ku plaser nos a entrega nos relato anual 2013 oudita na akshonista di nos kompania, den persona di Minister Sr. Balborda.” Sluis a bisa ku C-Post International den e aña ku ta tras di lomba e sigui enfoká riba e plan empresarial ambisioso di e kompania di mas aña.  E kompania i su empleadonan ta keda hasi nan esfuerso pa konkretisá esaki na bienestar di nos komunidat i kontinuidat duradero di e kompania.