Willemstad 16 di mart 2015- Resientemente  C-Post International (C-Post) i Curinde a firma un akuerdo di entendementu.  Ámbos kompania di gobièrnu. Ku e akuerdo aki ta pone base pa desaroyá fasilidat i opshonnan moderno ku mester benefisiá aun mas e komersiante den nos Zona liber pa e por krea mas negoshi i sirbi su klientenan mihó.   Hasiendo esaki e dos kompanianan ta krea tambe oportunidatnan interesante pa desaroyo i establesimentu di empresanan nobo ku lo ke establesé den nos  zona liber. C-Post pa algun tempu kaba ta desaroyando, konforme nan maneho empresarial, formanan nobo pa ofresé servisio na nos komunidat, ku bista riba e kambio di patronchi di e hende moderno.  C-Post ta kere ku e por brinda merkadonan nobo i interesante pa komersiantenan ku ta operá for di zona liber di Kòrsou atraves di e.o. su servisio di www.righttothedoor.com.  Curinde di su parti ta invertiendo, konforme un strategia bon deliñá, den un realisashon di un maneho i instrumèntnan pa fasilitá negoshinan ku ta operá for di nos zona liber. E ambiente aktual den kua nos empresanan na Kòrsou enpartikular pero den mundu engeneral, ta yena ku reto.  Curinde ta konvensí ku tin espasio pa empresanan di Kòrsou por konosé desaroyo positivo ofresiendo produktonan outéntiko i di kalidat. Tantu C-Post komo Curinde ta kere di por koperá i brinda e komersiante den zona liber opshonnan ku ta pas den e mundu moderno afin ku nan por krea mas merkado i sirbiendo nan klientenan mihó, lagando sufisiente espasio pa kada komersiante mes desaroyá su negoshi. Ku e akuerdo aki C-Post i Curinde a krea un base pa hasiendo uso di e forsa di ámbos kompania, kombiná ku e espíritu empresarial di nos komersiantenan den nos zona liber, nos krea mas aktividat ekonómiko i mas bienestar pa Kòrsou.