Enfoke riba outomatisashon i digitalisashon di prosesonan empresarial
WILLEMSTAD – E gran mayoria di sektor komersial ta antisipá ku inovashonnan digital ta bira importante den e sinku añanan binidero pa nan empresa i pa Kòrsou. Mas ku 50% di e empresanan ta antisipá ku den e sinku añanan binidero un otro negoshi ta drenta merkado ku lo bai kompetí a base di teknologia nobo. Tòg 70% di e empresanan ta kere ku aki sinku aña lo brinda e mesun produkto òf servisionan. Desaroyonan nobo riba tereno spesífikamente di teknologia di informashon durante e último sinku añanan a kondusí spesialmente na invershonnan den outomatisashon i digitalisashon di prosesonan empresarial ku e ophetivo pa drecha e efisiensia. E sinku añanan binidero tambe ta antisipá ku invershon den outomatisashon i digitalisashon ta keda importante. Un punto di atenshon ta kon empresanan mas chikí ta keda atras pa loke ta inovashon, i ku e bista lo ta mas tantu riba teknologianan nobo.
‘Waves of innovation’
E tema spesial di e Business Survey 2018 tabata ‘Waves of innovation’. Internashonalmente tin hopi atenshon pa inovashonnan salí for di desaroyonan riba tereno di teknologia di informashon. Kòrsou tambe den e último añanan tabatin di haber ku un kantidat grandi di desaroyo inovativo. Ehèmpelnan di esei ta: internèt móbil i teknologia di cloud; Airbnb; energia renovabel; e-commerce; outomatisashon i digitalisashon di prosesonan atministrativo den sektor finansiero. E desaroyonan potensialmente tin konsekuensia sosial grandi, por ehèmpel riba enseñansa i merkado laboral. E preguntanan ku a hinka den e enkuesta tokante e tópiko tin komo meta pa duna un promé empuhe dunando un bista di importansia di e desaroyonan.
‘Waves of innovation’ – Highlights, e último sinku añanan
E diferensianan entre e diferente tiponan di negoshi (grandi i chikí, respektivamente di eksportashon i no-eksportashon) pa loke ta e faktornan ambiental ku tin influensia riba e desishon pa inová, no ta grandi. Por bisa ku pa mayoria tipo, preferensianan kambiando di e konsumidó i desaroyo teknológiko tabata lo mas importante, ku eksepshon di empresanan grandi ku a indiká ku nan ta mas sensibel pa sirkunstansianan makro-ekonómiko ku ta kambia i pa regulashon di parti di gobièrnu. Outomatisashon i digitalisashon di prosesonan (atministrativo) tabata pa mayoria parti e faktor mas importante, pa kompanianan tantu grandi komo chikí, di eksportashon i no di eksportashon. Pa empresanan grandi i esnan ku no ta eksportá esaki tabata konta mas ainda ku pa empresa chikí i empresanan eksportadó. Esaki tabata un resultado inesperá komo ku empresanan ku mester mantené kabes riba awa riba merkado internashonal, por lo general ta inová mas rápidamente. Pa tur e inovashonnan sugerí ta konta ku introdukshon di inovashon pa e parti mas grandi a tuma lugá na empresanan grandi, mas ku na empresanan mas chikí. Pa tur e inovashonnan a konta tambe ku introdukshon di inovashon a sosodé pa e parti mas grandi na empresanan ku ta eksportadó, mas ku na empresanan ku no ta eksportá.
Pa alrededor di 50% di e empresanan, mehorashon di efisiensia tabata e motibu prinsipal pa inová. Esaki ta konta tantu pa empresa chikí komo pa grandi i pa empresa eksportadó i esnan no eksportadó. Un persentahe chikitu so di e empresanan a indiká ku kompetensia di kompetidornan den eksterior òf lokal tabata un rason importante pa nan inová.
‘Waves of innovation’ – Highlights, e sinku añanan binidero
90% di e empresanan ta kere ku inovashonnan digital nobo lo bira importante pa Kòrsou. E porsentahe aki pa empresa propio ta 80%. Riba e pregunta si e miembronan di gerensia den e negoshi ta bon na altura di inovashon digital i nan posibilidatnan, 40% di e empresanan a kontestá ku esei no ta e kaso. E mayoria grandi di e empresanan, alrededor di 70%, ta pensa ku aki sinku aña nan lo produsí e mesun produkto i servisionan ku awendia. Pa e empresanan grandi i esnan ku ta eksportá esaki ta pisa mas tantu ainda. Mas ku 50% di e empresanan ta antisipá ku dentro di sinku aña un empresa nobo ta drenta merkado ku lo hasi uso di un teknologia ku ta diferente for di esun tradishonal, usual i tradishonal. Di e empresanan grandi kasi 70% ta antisipá algu asina. E dos eksperensianan aki ta parse di ta kontradesí otro. Na esun banda e parti mayoritario di e empresanan ta spera ku aki sinku aña nan ta brinda e mesun kos, pero na mes momento nan ta spera otronan den merkado ku a base di teknologia nobo lo bin kompetí ku nan. E sinku añanan binidero spesialmente internèt móbil, outomatisashon di servisionan di konosementu i ‘internet of things’ lo bira importante pa sektor komersial di Kòrsou. Un kantidat muchu mas chikitu di empresa ta duna desaroyonan teknológiko riba tereno di robòt, vehíkulonan outónomo, imprenta 3D, depósito di energia i realidat virtual un posishon importante. Un posishon intermedio tin pa blockchain i inteligensia artifisial.
25-30% di e empresanan ta antisipá ku den e sinku añanan binidero lo invertí den maneho pa mantené un bon relashon ku kliente (customer relationship management). Di e empresanan grandi ta antisipá ku lo invertí alrededor di 35% den outomatisashon di prosesonan empresarial. Empresanan chikitu, mas ku empresanan grandi, respektivamente mas ku 20% i ménos ku 10%, ta antisipá ku nan lo invertí den paketenan di software pa negoshi (enterprise application suites). Esaki ta indiká ku empresanan chikitu lo mengua nan retraso. E porsentage abou di empresa ku ta kere ku nan lo invertí den robòt, imprenta 3D i realidat virtual ta koinsidí ku e espektativanan pa loke ta e papel di teknologianan den e sinku añanan binidero.