ORANJESTAD, Aruba – 5 di Juli 2016: Buleria ta cla pa celebra su di dos aniversario cu pueblo di Aruba. Door cu esaki ta un ocasion hopi importante no por laga afo celebr’e cu pueblo henter. Pa cu esaki lo tin un tremendo fiesta na Renaissance Convention Center riba diasabra 9 di Juli proximo: Blu-2 Buleria 2 Aniversario. E preparacionnan ta grandi y riba esaki Dwight Leoneta a laga sa cu e parti organisatorio ta practicamente cla y por premira un anochi grandi atrobe. Buleria ta bay ta celebrando su di dos aña hunto cu su fanaticonan. “Aruba a carga Buleria manera un baby y a yuda nos gatia, lanta y cana. Nos ta den proceso ainda di cana anto mi ta kere ta bunita pa nos celebr’e diasabra awor den Renaissance Convention Center”, Leoneta a expresa.

Lo tin como invitado “Q- Sign Mellowstreet despues di 6 aña cu nan ta na Aruba y cu nan a marca historia cu hopi influencia ariba otro agrupacionnan musical den e region. Despues di hopi esfuerso di parti di Elite Productions a logra pa Q-Sign Mellowstreet por presenta na Aruba y celebra conhuntamente e di dos aniversario di Buleria. Banda di esey lo tin e DJ’s reconoci di nos isla manera Dj Vibez, NutzBeatz, Oz y Ro-1 for di Corsow cu ta un di e DJnan cu a yuda carga Buleria na e isla ruman durante e dos añanan aki.

Segun Dwight Leoneta, Buleria tin plannan pa e aña aki y pa e luna di September lo bay Corsou y mientrastanto lo pone enfasis cu presentacionnan na Aruba. Tin giranan pa otro islanan den e region, pero asina keda cla lo informa riba esey.

Despues di 2 aña Buleria a bira un famia y “cada un di nos a siña conoce otro….E manera con nos ta kere den otro esey ta hopi bunita”, Dwight Leoneta a duna di conoce. Un otro aspecto di Buleria ta e creatividad. Nan a keda traha riba consistencia y cosnan nobo. Tin un manera di mercadea y crea produccionnan nobo. “Nos ta keda gradici tur e fanaticonan cu ta pendiente pa cosnan nobo”.  Pa Buleria e union entre artistanan ta hopi importante y nan lo sigui percura pa esey.

Pa loke ta e benta di ticketnan pa diasabra esakinan ta bayendo manera pan cayente. Tin ticketnan na benta na Gallo Rojo y Hamaca Sidewalk Café. Aworaki e prijs general ta Afl. 75. VIP tickets, e number di contacto ta 744-6480. Dwight Leoneta a finalisa gradiciendo e fanaticada di grandi te chikito cu a carga Buleria durante e dos aña aki. “Nos ta sigui conta cu nan sosten y nos sigur lo sigui saca cara di Aruba cada momento cu nos haya e oportunidad pa haci esey”, el a bisa.