Willemstad- Promotornan di e Buki Mundial 2014, djasabra último a presentá portada di e buki. Titulá “Ku bista riba Brazil”, e portada ta un bunita diseño di Juni Marselia kende ta hefe di produkshon di e buki. E portada ta reflehá kara di un dama ku wowonan kritiko riba Kopa Mundial 2014. Riba e kara, tin pintá un obra artístiko ku ta reflehá e bandera di Kòrsou pa mustra ku na Kòrsou tambe tin atenshon pa e fiesta di futbòl pero ku bista kritiko.  Kritiko pasobra, pa e 31 ekiponan ku mester a klasifiká pa djòin e anfitrion Brazil e aña aki na Kopa Mundial di FIFA e tabata un kaminda largu di trabou duru, sakrifisio i di determinashon. Esaki no ta nada kompará ku e sakrifisio, bida duru i determinashon pa biba, ku hopi na Brazil mester tin pa simplemente keda na bida. Mundu kompletu su bista ta riba Brazil. Amnesty International den nan reportahe ta kalkulá ku polis ta asesiná konsientemente mas ku dos mil hende pa aña sin wòrdu pèrsigui. Polis a limpia mas ku 200 favela pa gobièrnu i FIFA por presentá e farse na mundu ku tur kos ta bunita na Brazil. Ora nos ta wak mundial i e protestanan violento lanta atrobe, kòrda ku tin un motibu mas su válido pa esei. “Ku bista riba Brazil” ta reflehá tambe e portada di nos edishon. Wak e mundial aki ku dos wowo skèrpi i keda konsentrá. Apesar di tur esakinan, nos a traha e di shete “Buki Mundial” pa bosnan ku e amor i dedikashon di semper. E tim di produkshon huntu ku representante di Maduro & Curiel’s Bank, sra Mariela Romero a desvelá e portada djasabra na Rio Lounge and Sport’s Bar. Ta spera e promé kopianan riba merkado pa final di luna.