E Buki Mundial 2014, ta kla i repartí na mas di 200 punto di benta na Kòrsou pa solamente 5 florin.  E puntonan ta enserá toko, mini market, supermerkado den barionan di Kòrsou i tambe tur libreria. Un kantidat di 20 mil ehemplar a keda imprimí i repartí. Esaki ta e di 7 edishon “Buki Mundial”, ku ya ta un publikashon di tradishon for di 1990. Despues di 28 aña, e Tim di Produkshon ta konkluí ku esaki ta e mihó produkshon den tur. No solamente na presentashon di un bunita portada, sino tambe na kontenido. Buki Mundial Brazil 2014, ta kontené 164 página kompleto di Tur Tim, Tur Istoria, Tur Strea kombiná ku foto i un skèdjul di 3 página kompleto di e mundial adaptá na orario di Kòrsou. E portada “ ku bista riba Brazil” ta reflehá dos wowo skerpi di un fanátiko femenino pintá na bandera di Kòrsou. Skerpi pa ta kritiko riba e nivel di futbòl pero tambe kritiko riba e pobresa di Brazil unda muchanan ta biba riba kaya i ta kuadra ku e imáhen bèrdat den e míles di favelanan (barionan pober) na Brazil. Ni FIFA ni tampoko gobièrnu di Brazil por skonde e bèrdat. P’esei Kòrsou su wowonan mester keda fihá riba e mundial na Brazil. Apesar di tur kos, e mundial na Brazil ta serka di kas. P’esei nos a traha e Buki Mundial pa Kòrsou ku amor i dedikashon di semper. Disfrutá di di dje! Tim di Produkshon Lilo Sulvaran, Glenn Sulvaran, Peppie Sulvaran, Broertje Reenis, Quincy Maduro, Gurtney Jansen, Remfis Donker i Juni Marselia