Willemstad, yüni 2013 – Ya pa sigur mas ku 20 aña kaba (for di tempu di Setel), UTS, den estrecho koperashon ku KPMG (KPMG in the Dutch Caribbean i KPMG Meijburg Caribbean), ta presentá Buki di Telefòn. KPMG semper a spònser e produkshon di e kaft, dunando esaki un tema ku ta biba den komunidat den e aña en kuestion, akompañá pa un diseño ku ta kuadra ku e tema. UTS ta sumamente kontentu i agradesido ku nan konfiansa i koperashon den e parti aki for di komienso. Nos buki di telefòn a para bira un parti di nos bida diario i tambe un parti indispensabel di e mobilario di kas i ofisinanan na Kòrsou. E ta e promé medio ku un hende ta konsultá, ora ku e ta buská un otro persona, servisio òf instansha. Ansiosamente tur aña di nobo, komunidat di Kòrsou ta warda pa sa ki tópiko òf inovashon UTS i KPMG lo bin kuné pa loke ta trata e kaft di buki di telefòn. E aña aki, KPMG i UTS huntu a bini ku un tremendo inisiativa, pa laga komunidat di Kòrsou, den e kaso aki hóbennan entre 12 pa 18 aña, partisipá aktivamente den eskoho di e tema di buki di telefòn 2014 pa medio di un kampaña. E hóbennan aki mester bini ku un tema interesante ku lo bai biba den nos komunidat den aña 2014 i motivá tambe nan eskoho. E tema ganadó lo wòrdu ilustrá profeshonalmente riba e kaft di buki di telefòn 2014, naturalmente huntu ku e nòmber di e hóben ganadó. Ademas e hóben aki lo gana tambe un Samsung Galaxy Tab 2 huntu ku servisio di UTS 4G+ pa un aña largu. Kuminsando djaluna 3 di yüni 2013, tur skol sekundario, kaminda hóbennan di 12 pa 18 aña ta wòrdu eduká, lo risibí un karta indikando e tremendo kampaña aki i tambe kon pa partisipá. Esaki ta masha fásil! E hóbennan aki mester registrá nan mes te ku dia 17 di yüni 2013 riba www.bukiditelefon2014.com. Riba e website aki nan lo haña tambe e reglanan i eksigensianan pa por partisipá. Por manda e tema di buki di telefòn 2014 huntu ku un motivashon kòrtiku ku dia 1 di yüli 2013 na theme@bukiditelefon2014.com. Pues UTS i KPMG ta enkurashá mayornan i dosentenan di e hóbennan aki pa nan partisipá den e Buki di Telefòn ‘Cover Theme Competition’ aki, p’asina nan demostrá nan talento i kreatividat  i alabes gana un tremendo premio, ku sigur lo ta hopi útil pa nan estudio. Tantu UTS komo KPMG ta sumamente orguyoso di por aportá dje forma aki na formashon di nos hóbennan, dor di duna nan tambe  e chèns pa demostrá nan talento i kreatividat.

Di e manera aki UTS i KPMG ta kontribuí na forma hóbennan prepará, responsabel i útil pa nos komunidat.