Diabierna atardi 5’or e team di Train Hard Fight Smart di Brazil Taekwondo Stichting a completa nan camp training na Pung Saeng High School na Seongnam Korea. E team bou encargo di ex campeon mundial Henk Meijer kende a regla tur cos pa e team di Brazil Taekwondo Stichting aki na Korea ta mira atras ariba un siman y mey di training. E muchanan a train dos biaha pa dia hunto cu e Koreanonan y e tabata hopi duro, mirando cu e Koreanonan ta train 5 dia pa siman tres biaha pa dia henter aña y nan ta bon custumbra cu e sistema aki caba, aunke bo ta wak nan zaak den otro tin biaha. Kiko nos a nota di e training ta cu nan tambe sa haya straf training ora cu nan no ta haci algo bon of si nan perde un pelea. Henter e grupo ta haya straf training.

Nos di Aruba no ta custumbra cu e candidad di biaha aki ainda, mirando cu na Aruba nos no ta conoce prof Taekwondo ainda. Esaki ta algo cu lo bin sigur den futuro kisas. E team di Brazil Taekwondo Stichting cu ta pa prome biaha na Korea hunto cu nan coach Clifford Rasmijn ta mira atras ariba un experencia unico na unda cu nan a wak hopi cos, siña hopi di e trainingnan, cultura y cuminda Koreano. Un luna na Korea na unda cu a raspa 3 medaya y un camp training ta duna di conoce cu nos tey, pero ainda ta falta hopi mas. Diadomingo awor 5 di nos atletanan ta bay para dilanti un otro oportunidad participando na e World Children Taekwondo Culture Festival 2015” na Maju, Korea. Esaki ta un otro test na unda cu lo evalua e 5 atletanan aki. Henk Meijer tin varios otro cos plania pa e team haci na Korea prome cu nan regresa Aruba bek. Despues Hakeem Lowe y Clifford Rasmijn lo keda Korea pa e Campeonato Mundial di Cadet cu ta e dianan 23-26 di Augustus, mientras cu e otronan lo regresa Aruba bek pa asina prepara pa e Costa Rica Open 2015.