WILLEMSTAD – Kuerpo di Brantwer Kòrsou ta inisiá kampaña di prevenshon den bario nan na Kòrsou, den kuadro di duna informashon i konsientisá pueblo di Kòrsou pa por yega na ménos kasnan na kandela. Durante último añanan, Kuerpo di Brantwer Kòrsou a tuma nota ku tin diferente kasnan ta kima i famia nan ku ta keda den tristesa despues ku nan a pèrdè tur nan propiedat. Den kuadro di esaki, Brantwer Kòrsou kier konsientisá komunidat kon pa kuida nan kas na e mihó manera i tambe kon pa prevení i asina evitá situashonnan lamentabel i doloroso.

Durante di e kampaña aki, miembronan di Departamentu di Prevenshon i tambe bomberonan di warda, lo ta den bo bario na unda nos lo duna informashon kon pa halsa e seguridat di bo kas kontra di kandela. Tambe lo duna konseho i vários tep, kiko kada habitante lo por hasi na momentu ku surgi un kandela den bo kas. E promé bario ku lo risibí informashon den kuadro di e kampaña “Prevenshon, E mihó opshon” ta bario di Otrobanda.

Habitantenan di área di Rif, Seru di Otrobanda, Dòmi Abou, Mundu Nobo i Baraltwijk ta keda kordialmente invitá pa tei dia 21 di Yüni 2018, pa 7or di anochi na Sentro di Bario Otrobanda. Dia 26 di Yüni e anochi di informashon lo tumá lugá riba patio di Crown Automotive/Hyundai na Seru Domi, i einan habitantenan di Seru Domi, Kortijn, Kura di Shon Fil i San Matheo lo por djòin pa risibí tur informashon relevante pa nan kas. Den luna di Yüli, lo bishitá bario di Jandorèt, Boka Samí i bisindario. Durante di e anochi nan di informashon aki, ta importante pa trese bo propio stul, miéntras ku un sapatu kómodo na pia tambe ta importante pa e partisipashon na demostrashonnan ku Kuerpo di Brantwer Kòrsou lo duna.

Pa kualkier informashon relashoná ku e anochi di informashon den bo bario, por tuma kontakto ku Departamentu di Prevenshon di Brantwer Kòrsou na 462-9111.