Diasabra 28 di juni 2014, dos talent hoben, atleta di bowling a bai representa Curacao den dos kompetensia importante na Merka. Nan ta Francesca Macares di 18 anja I Jared Felipa di 13. E kompetensia nan aki ta konta entre esnan mas prestigioso riba e nivel di Youth na Merka. E prome kompetensia ta Teen Masters ku ta di 1 di yuli pa  5 di yuli 2014. Teen Master  ta pa tur atleta bou di 22 anja ku ainda ta bai skol.  Den e torneo aki ta e abilidat di e atleta ta konta. Kontrali na tur otro kompetensia,  tur atleta ta obliga di huza mesun tipo di bala, esta un PBA Skill 2.0 Plastic I un PBA Skill 3.0 Urethane. E bala nan aki ta paresido na e bala ku tabata huza den prinsipio di e deporte aki. Francesca lo partispa den e divishon Girls U-20 I Jared den Boys U-14.  E sigiente kompetensia ta Junior Gold, ku ta tuma luga na Buffalo, New York di 12 di  yuli te ku 18 yuli 2014. Francesca a kwalifika pa partisipa na e evento aki ganando e kompetensia di “Jose Luis ‘Chegui’ Carde” na Puerto Rico, December ultimo. Interesante di e kompetensia nan aki ta ku e hoben nan aki ta kompeti kontra e miho nan di Merka den nan categoria . Hasiendo esaki nan ta atkeri konosementu i eksperensia ku ta alsa nan nivel di wega i yuda pa forma nan komo atleta internashonal. Otro aspekto hopi importante ta ku partisipando na e torneonan aki, e atleta por gana scholarship i tambe gara atenshon di e varios scout di e diferente universidat  grandi  di Merka. E scout nan ta asisti e dos torneo nan aki en buska di talento. E atleta nan kier gradisi tur sponsor ku di un of otro manera a yuda nan pa realisa nan biahe. Nos ta desea e atleta nan tur klase di eksito !