Willemstad 02 yüni 2015 : Djamars dia 2 di yüni Bos di Hubentut a organisá un atardi ameno kaminda a introdusí e embahadornan di Bos di Hubentut i lansa nos wèpsait nobo. Fundashon Bos di Hubentut ta konosí komo e organisashon ku tin dos proyekto grandi kual ta Kibrando Gritunan Silensioso kaminda ta konsientisá hinter pueblo di kòrsou riba e problemátika di abusu seksual di mucha i hóben. For di 2006 a kuminsá ku e proyekto aki den forma di obra teatral, charlanan, dokumentario

“Ku ki derechi” i drenta skolnan básiko i sekundario pa duna e kurso di prevenshon. E otro proyekto grandi ta Brigada di Seguridat i Formashon. Brigada di Seguridat i Formashon ta un proyekto kaminda hóbennan entre 12 i 25 aña ta vigilá seguridat di mucha hóben durante eventonan públiko. E idea di brigada a lanta na aña 2004 ora Hudraine Papa a bira viktima den e aktividat públiko di seú kual a kosta su bida pa falta di seguridat. E aksidente aki a motivá Fundashon Bos Di Hubentut pa tuma inisiativá pa lanta un brigada  formá dor di hóbennan bon prepará mental i físikamente pa por duna asistenstia den aktividatnan manera karnaval di mucha, parada di tiner, Seú i otro aktividat públiko. Fundashon Bos di Hubentut a aserká Sra. Nicole Maduro i Sr. Clifton Wallé pa ta embahadornan di Fundashon Bos di Hubentut. Sra. Nicole Maduro ta periodista i ta laborá na Telecuraçao i Sr. Clifton Wallé ta direktor propietario di Infinitum BV. Nan a tuma e reto pa duna sosten na e proyektonan aki dor di duna konseho, yuda den búskeda di fondo i establesé relashonan di trabou ku otronan. Nan tin e tarea pa yuda propagandá e proyektonan aki den tur forma. Sra. Maduro i Sr. Wallé ta para na bienestar i desaroyo  di mucha i hóben. Mirando e trabounan ku Bos di Hubentut a bin ta hasi na bienestar di nos muchanan i hubentut di Kòrsou mester di hopi suidadano mas ku e kurashon noble pa saka un man i yuda ku ta yuda engrandesé nos pais Kòrsou. E promé tarea ku nos embahadornan a kumpli ku ne awe ta di lansa e wèpsait di Fundashon Bos di Hubentut, ku hopi orguyo nos kier invitá pueblo di kòrsou pa subi riba www.bosdihubentut.com kaminda por haña informashon di tur e proyektonan. Riba e wèpsait por mira historia, vishon, mishon i tambe potretnan di e fundashon. Nos ta yama nos embahadornan un kaluroso bon biní den e reto nobo aki. Nos ta orguyoso di tin boso.