Willemstad – Resientemente BOPEC a sera un areglo di penshun flèksibel pa su empleadonan, i ku esaki ta kontribuí na siguridat den futuro di su personal. Bonaire Petroleum Corporation NV ( BOPEC) ku mas ku 100 empleado ta un dje kompanianan mas grandi na Boneiru. BOPEC ta propiedat di Petróleos de Venezuela, SA (PDVSA). Ta usa e kompania komo un depósito pa warda petrolio, i tambe komo un stashon di transbordo pa petrolio i otro produktonan derivá di petrolio. E kompania tin  kapasidat pa warda 10 mion barí i ta disponé di wafnan situá na awa hundu kaminda barku grandi por mara.

Ku hopi koutela BOPEC a skohe un kompania nobo pa sigurá nan penshun kolektivo.  Basá riba konseho independiente di Atlas Risk Solutions i Henriquez  & Vornis Insurance Consultancy a disidí ku, teniendo kuenta ku BOPEC su deseonan, ENNIA ta e mihó opshon.  ENNIA a krea un areglo di penshun flèksibel i na midí pa BOPEC. E areglo ta kumpli ku eksigenshanan di e dunadó di trabou, empleadonan i sindikato. Via un penshun e empleado ta akumulá un entrada pa ora e baha ku penshun i ta sigurá tambe un entrada pa su famia den kaso di fayesementu òf invalides.

Riba potrèt por mira firmamentu di e akuerdo di penshun dia promé di febrüari na Boneiru.

ENNIA ta orguyoso di e koperashon nobo akí ku BOPEC, i ta felisitá e kompania i su empleadonan ku e areglo di penshun nobo i flèksibel akí.