Ofresiendo 2 buelo pa siman pa Kòrsou

WILLEMSTAD- 3 di yüli 2021 – Den un ambiente ameno na Aeropuerto Internashonal Hato a tuma lugá selebrashon di e buelo inougural di Air Belgium for di Bèlgika pa Kòrsou. Entrante 3 di yüli, Air Belgium a start su buelo ku frekuensia di 2 biaha pa siman saliendo for di Brussels Charleroi Airport pa Kòrsou via Martinique. Durante e resepshon a hiba palabra, Minister di Maneho di Gobernashon, Planifikashon i Servisio Públiko sr. Ornelio Martina (den representashon di Minister di Desaroyo Ekonómiko sra. Larmonie – Cecilia), Minister di Tráfiko, Transporte i Planifikashon Urbano, sr. Charles Cooper, Chief Commercial Officer di Air Belgium, sr. Philippe Wilmart, Director of Air Service Marketing & Development na Curaçao Airport Partners, sra. Peggy Croes i Managing Director di Curaçao Hospitality & Tourism Association sra. Maria-Helena Seferina-Rojas.

E buelo di Air Belgium lo habri posibilidat pa Kòrsou risibí mas bishitante for di e merkado di Europa sea pa un biahe di negoshi òf plaser. Alabes e konekshon nobo aki ta habri e oportunidat pa Kòrsou risibí tambe turista for di Martinique kual lo ta un merkado nobo pa Kòrsou. Nos pais tin hopi pa ofresé; entretenementu, kultura, historia, arkitektura, playa, variedat di atrakshonnan turístiko i mas ku tur kos nos hendenan servisial.

Durante e resepshon Minister Martina huntu ku Minister Cooper i sr. Paul Pennicook, CEO di Ofisina di Turismo di Kòrsou (CTB), a hasi entrega di un plakat konmemorativo na sr. Philippe Wilmart di Air Belgium na okashon di nan promé buelo pa Kòrsou.

Gobièrnu di Kòrsou, Ofisina di Turismo di Kòrsou (CTB), Curaçao Airport Partners (CAP), Curacao Airport Holding (CAH) i Curaçao Hospitality and Tourism Association (CHATA) ta felisitá Air Belgium ku e buelo nobo i ta deseá nan tur kos bon.