Willemstad – En konekshon ku Dia Internashonal di Boluntario, Curaçao Cares ku sosten di BearingPoint Caribbean ke buta algun ‘Star Volunteer’ den ‘spotlight’. Organisashonan sosial, di deporte, di bario i otronan ku tin algun boluntario eksepshonal por nominá nan ‘Star Volunteer’ te ku 13 di novèmber 2015. 

Dia 5 di desèmber ta Dia Internashonal  di Boluntario. Nashonan Uní a instalá e dia aki pa mundialmente rekonosé i gradisí esnan ku ta dun’un man i yuda sin spera nada akambio i pa motivá otronan pa hasi mes un kos. En konekshon ku Dia Internashonal di Boluntario, Curaçao Cares ke duna atenshon na algun ‘Star Volunteer’ durante di e luna di desèmber. Den 2014 un total di 36 boluntario a keda nominá. Entre nan señora Linuska Martina Bernadina i señora Lorain Sanchez a risibi un menshon honorabel. Señora Ana Middelhof, señora Sandra Hay i señor Jose Pinedoe a ser distingui komo ‘Strea Boluntario’ di 2014.

Star Volunteers’ ta forma parti di kada komunidat, nan ta un grupo diverso ku diferente historia pero ku tin algun karakterístika en komun; nan ta duna nan tempu sin spera nada a kambio, na ta kontribui na mehorá nos sosiedat i ta distinguí nan mes den nos komunidat, aunke ku hopi biaha nan ta invisibel pa e publiko general. ‘Star Volunteers’ ta e héroenan di hopi kausa i organisashon sosial ku ta grandi, chikitu, popular i menos popular. E trabou ku nan ta hasi no ta kos di un biaha. Nan ta determiná pa kontribui pa alsa kalidat di bida den nos komunidat.

Bo konosé un boluntario eksepshonal? Nomin’é i kisas e persona lo ser nombrá un ‘Star volunteer’ e aña aki. Tuma kontakto ku Curaçao Cares na Email: community@curacaocares.org  òf yama number di telefón 7361951 ext 218.