Willemstad – No ta hopi ta e kompanianan ku tin empleado ku hopi aña den servisio. Den kaso di Maduro & Curiel’s Bank por konstatá ku tin diferente empleado ku tin hopi aña den servisio. Esaki ta muestra ku e empleadonan ta stima nan trabou i nan Banko. Gerensia di MCB ta rekonosé e balor i lealtat di kada un di su empleadonan. “Nos empleadonan ta un pilar importante di nos Banko. Sin nos koleganan nos no por duna nos klientenan e servisio ku nan meresé. P’esei nos ta duna nan tambe nos voto di konfiansa i sòru pa kada un di nan ta bon kuidá”, asina Chicu Capriles ta bisa na numeroso okashon. Regularmente MCB ta selebrá aniversario ku  koleganan. Resientemente esei a tuma lugá kaminda gerensia a selebrá i rekonosé nan pa nan trabou i lealtat. Tin 3 empleado ku a sobresali e okashon aki pasó banda di selebrá mas ku 40 aña di servisio nan a baha ku un penshun bon meresí tambe. Ta trata aki di sr. Mannik Dindial i sr. Erwin Asjes tur dos a kumplí 45 aña di servisio i sr. Anthony Wanga ku a kumplí 43 aña di servisio.

Mannik Dindial (45 aña di servisio)

Mannik a drenta den serviso di MCB dia 1 di yüli 1968 i a okupá diferente posishon den banko. Esun di mas resién ta komo General Manager Human Resources. Tambe Mannik ta gusta planta mata i tur loke tin di haber ku músika, inkluso kanta.

Erwin Asjes (45 aña di servisio)

Erwin a drentá den servisio di MCB dia 1 di mart 1969. Erwin su trayektoria den banko ta largu. Ela kumisá traha komo Junior Clerk pa sigui krese durante añanan i awor promé ku su penshun e tabata Manager di Sales & Operations. Erwin ta un ehèmpel bibu ku ora bo traha duru ku dedikashon, amor i disiplina bo por sigui krese den trabou.

Anhony Wanga (43 aña di servisio)

Anthony a drenta den servisio di Bo Banko Amigu dia 1 di sèptèmber 1971. Anthony meskos ku Erwin i Mannik tin un trayektoria largu na MCB. Anthony a kuminsá komo General Assistant den Reconciliation Department. Ela sigui krese i té na último aki a baha ku penshun komo Senior Assistant Auditor B den MCB su departamentu di Audit.

Gerensia di Maduro & Curiel’s Bank ta yama danki na Mannik, Erwin i Anthony pa nan trabou balioso na MCB i ta kontentu ku nan ta bai disfrutá awor di un penshun bon meresí.