E Legendario Rhythm & Blues Cruise (Blues Cruise) ta biniendo Kòrsou. Dia 24 di òkober e barku krusero di Legendary Rhythm & Blues di Blues Cruise ta yega Kòrsou ku 1800 pasahero, ku ta inkluí 25 banda di Blues. Huntu ku Fundashon Bon Intenshon nan ta ofresé Kòrsou presentashon di 3 banda di blues riba e mesun dia.

Den Riffort Village lo tin for di 4or di atardi presentashon di e 3 bandanan (artista di blues) ku ta: Samantha Fish i Mr. Sipp, ámbos artista ku a yega di presentá na Kòrsou kaba durante nos edishonnan anterior di Curaçao BlueSeas Festival, i un artista/banda ku lo toka aki pa promé biaha ku ta Mississippi Blues Child ku Christone ‘Kingfish’ Ingram.

Nan lo kuminsá ku nan show for di 4or di atardi i ta toka te 8:30 or, e momento ku nan mester regresá nan barku pa sali pa nan siguiente destinashon. Di e pasaheronan ta spera sigur alrededor di 500 persona, ku lo baha bin disfrutá di Willemstad, pasobra ya nan tabatin oportunidat pa gosa di e bandanan aki riba barku, mientras nos di Kòrsou ta den e chèns úniko atrobe di disfrutá di dushi músika i interkambiá ku e bishitantenan aki ku ta bin disfrutá di e hospitalidat Kurasoleño.

Fundashon Bon Intenshon ta gradesido na Curaçao Tourism Board, ku tambe a hinka nan skouder bou di e proyekto aki, pa hasi e produkto Kòrsou ainda mas interesante pa nos turismo.

Fundashon Bon Intenshon ta trahando en todo kaso riba un plan duradero pa frekuentemente nos mira Legendary Rhythm & Blues Cruise aki na Kòrsou i kisas asina tambe duna nos Curaçao Blue Seas un balor agregá.

Fundashon Bon Intenshon ta trahando riba un plan, pa laga Legendary Rhythm & Blues Cruise bini en todo kaso, kada 2 aña Kòrsou. Tambe konhuntamente nos ta trahando riba un plan, pa ora e barku aki bishitá Kòrsou, pa kombiná esaki ku organisashon di Curacao BlueSeas Festival. Otro aña lo organisá e BlueSeas Festival atrobe den sentro di nos suidat.