Willemstad, Curaçao, 12 di Ougùstus 2019: Blue NAP Americas, kual ta un di e sentronan di data mas avansá den e region di Merka i Merka Latino, sertifiká pa Tier-IV, i ku por akapará un gran kantidat di kliente, a apuntá Danilo Zabala komo e Chief Executive Officer nobo di e kompania. Esaki a drenta na figor for di 1 di Yüni. E kontinuidat pa loke ta trata e rumbo di e kompania tabata e preferensia den e transishon. Pues, en bes di apuntá un persona eksterno kual su maneho lo por tin komo konsekuensia muchu kambio, e Hunta di Komisario di Blue NAP Americas a òpta pa promové nan Chief Commercial Officer pa e funshon di CEO, ya ku nan ta rekonosé señor Zabala komo un persona ku gran konosementu di e maneho interno i nan tin e konfiansa ku e lo por sigui guía e kompania riba e rumbo aktual.

For di e momentu ku a apuntá Danilo Zabala den e funshon di CCO na 2016, e tabata e persona kardinal pa loke ta trata atraé un kantidat di e kompanianan mas renombrá na mundu pa Blue NAP Americas. E la fortalesé relashonnan ku institutonan gubernamental i bankonan komersial, ku konsekuentemente awor tambe ta parti di e portfolio di kliente di Blue NAP Americas. E liderazgo ku Danilo a demonstrá den e area di komersio tabata esensial pa por a fortalesé e identidat di Blue NAP Americas komo unu di klase mundial den e merkado di sentro di data.

“Komo e CEO nobo di Blue NAP Americas, mi ke sigurá nos klientenan ku nan lo por sigui konta ku e mesun nivel di servisio i dedikashon firme pa ofresé e standart mas haltu pa loke ta trata teknología i seguridat pafó di Estados Unidos”, CEO nobo di Blue NAP Americas Danilo Zabala ta indiká. “Ta nos vishon pa bira e puerto prinsipal pa e tráfiko di nètwèrk entre Estados Unidos i Merka Latino, i nos lo logra nos meta dor di kumpli ku e kriterionan internashonal mas haltu ku tin”.

Historia di Blue NAP Americas
Blue NAP Americas, lansá na Kòrsou den Desèmber 2016, ta un sentro di data diseñá komo portada neutral, i kreá i operá segun kriterio fihá pa por karga e sertifikashon di Tier-IV. E kompania ta sirbi nos region komo un Network Access Point (NAP), i alabes ta ofresé un portfolio ekstenso di solushonnan relatá na e sentro di data, entre otro Physical Colocation, servisionan di Private Cloud, i servisionan relatá na kontinuidat i maneho di negoshi. Blue NAP Americas ta konektá ku un nètwèrk diversifiká na kabelnan fibra bou di laman, kual ta krea akseso inmiedato na multiple portada rònt mundu. Pa mas informashon simplemente bishitá www.bluenapamericas.com, òf manda un email pa info@bluenapamericas.com.