…CTB i Santa Barbara Beach & Golf Resort Curaçao kontentu ku…

WILLEMSTAD- 12 di ougùstùs 2013 – Resientemente Kòrsou a risibí bishita di diferente ‘vloggers’ internashonal kompañá pa e popular Gnome di Travelocity. E terminologia ‘vloggers’ ta keda derivá for di video-bloggers. Bishita di e grandinan den e mundu di biahe ku tin míles di siguidó riba medionan sosial sigur ta di gran importansia pa nos isla i pa e motibunan aki CTB a aportá di un manera spesial. Pa esnan ku no sá e ‘Gnome’ di Travelocity ta un personahe masha popular na Merka i Canada. Ta trata aki di un kabouter ku ta biaha rònt mundu i tin míles di siguidó riba medionan sosial ku ta siguié unda ku e bai. E persona ku ta kuida e Gnome di Travelocity i ku semper ta kompañ’é unda ku e bai ta Srta. Courtney Scott kende tambe ta un di e konosínan den e mundu di biahe. Courtney Scott riba su mes tin un total di mas ku 7 mion siguidó riba medionan sosial i ta wòrdu konsiderá un guru den tur kos ku tin di haber ku biahe, kuminda i ambiente. Ademas di biaha rònt mundu Courtney ta kompartí su eksperensia i konosementu via di kanalnan di televishon i websáit; Today Show, NBC New York, AOL City’s Best, BootsNAll.com, Jaunted.com, Huffington Post i BuzzFeed.com. Komo un redaktor en-hefe pa Travelocity i produktor di e kompania ‘Let’s Roam Blog’, Courtney ta fungi tambe komo un fuente di media pa duna konseho di biahe, konseho di eventonan aktual, informashon, análisis di data i hopi mas.  Travelocity ta un di Kòrsou su sosionan prinsipal ku ta produsí un kantidat grandi di bishitante Nort Amerikano pa Kòrsou. Siman pasá Courtney kompañá pa 5 otro Vloggers; Kelley Ferro, Kristen Jacobson, Joshua Johnson, Gareth Leonard i Mickella Mallozi a bishitá Kòrsou riba invitashon di Santa Barbara Beach & Golf Resort Curaçao den koperashon ku CTB pa definí nan propio eksperensia di Kòrsou trahando un video di nos dushi isla. Tur esaki ta kontribuí na e esfuerso di CTB pa oumentá rekonosementu di e marka Kòrsou via di relashon públiko efektivo, publisidat i media sosial. Kelly Ferro su video a gana e premio di hurado i Courtney Scott a gana e  premio di “viewers award”. Ku brasa habrí a yama bon bini na e ‘vloggers’ nan. Tantu riba e Facebook di Kòrsou: www.facebook.com/curacaotb komo riba otro medionan sosial sigui e kódigo #cinecuracao kaminda por atmirá e video nan di e “‘vloggers’ nan ku realmente a keda espektakular.