pa aporta na personanan ku dwarslaesie
Willemstad, – Hopi enthousiasmo ta lanta den temporada di fin di aña. No solamente dor di temporada di harmonia i esfera di reflekshon pa ku nos prohimo. E enthousiasmo tambe ta bin dor ku ya pa 4 aña den yanuari tin e fundraising anual grandi di Fundashon Alton Paas.
September di 2017 Fundashon Alton Paas lo kumpli 5 aña di eksistensia. Ketu bai trahando ku e konfiansa den e abilidat, derechi i debernan di tur persona ku dwarslaesie. Pasobra tur persona ku dwarslaesie merese e oportunidat pa por dedika na nan mes pa mantene i desaroya nan abilidatnan pa por proheve pa nan mes i nan komunidat. Pa 4 aña kaba ku hopi reto i triunfo Fundashon Alton Paas a keda persistente pa por logra e soño ferviente ei. Voral awor despues ku e programa di televishon #Superando ta yegando na su final hopi reakshon positivo ta biniendo pa e informashon ku a bin dilanti. For di e kontenido di kada programa por a siña algu mas i ku ta un stap mas dilanti di krea mas aseptashon i kombibensia pa personanan ku dwarslaesie den komunidat. Pasobra bida ta sigi apesar di kon ferfelu un situashon por ta.
Pesei 15 di yanuari 2017 nos ta bai habri aña den gran forma. E evento aki ta krea e espasio ku komunidat por uni ku Fundashon Alton Paas pa move na bienestar di personanan ku dwarslaesie.
Tur aña nos a risibi reakshonnan di goso i satisfakshon di personanan ku a partisipa den e ‘Annual Fitness Challenge’ i nos tur komo persona ta konekta ku otro di un forma pesei nos ke invita rònt Kòrsou pa bini dia 15 di yanuari na International School entre 6or di mainta pa 12or di merdia. Meskos ku tur aña anterior lo tin diferente tipo di fitness programa. E aña aki a inklui 3 seshon diferente. Tai Chi spesial pa tur persona riba 60 aña. Kids Dance pa tur mucha entre 8 pa 15 aña i Pump on Wheels spesial pa personanan den ròlstul. Pa kompanianan nos tin un seshon spesial di spinning kaminda kompanianan ta inskribi komo grupo di 8 pa 12 persona. Kiermen tur hende por #BinMoveKuNos. Karchinan ya kaba ta optenibel serka fundashon mes. Pa adulto ta 35 florin. Hoben (8 pa 15 aña) i 60+ ta 15 florin.
Por yama nos na 5100087 òf 7363577 pa kumpra bo karchi òf registrashon pa spinning of mail nos na fitness@fundashonaltonpaas.org of info@fundashonaltonpaas.org.