Komishon , “Na interes di farándula”, instituí pa direktiva di Amak, ku sumo plaser, ta anunsiá, ku entrante djabièrnè 19 di yüni, aktividatnan farandulero por tuma lugar, si kumpli ku sierto kondishonnan.

Despues ku e komishon durante algun siman a negoshá ku e tim di minister di hustisia, i a presentá, un dokumento, den kua ta stipulá,proposishonnan pa kondishonnan pa reapertura di un forma responsabel di farándula, porfin a yega e momento, ku nos músikonan i demas aktornan farandulero, por hala un rosea, i ku nan por inisiá, nan aktividatnan mará na sierto kondishonnan.

Naturalmente den un negosiashon, no ta posibel pa logra tur lokual bo ta deseá, pero e palabrashonnan akòrdá, ta un paso firme, pa gradualmente yega na e normalidat kompleto.

Esaki ta nifiká, ku tantu  e músikonan i demas aktornan farandulero, mester aportá, pa e aktividatnan, por tuma lugar konforme e reglanan,  ku ta mará na e re-apertura di e aktividatnan kultural.

Despues di 2 siman despues di e re-apertura, outoridatnan i e komishon, lo hasi un evaluashon, i si tur kos  a kana bon, pa por tuma un desishon, pa sigui  suavisá e kondishonnan stipulá.

Reglanan di higiena, distansia sosial , registrashon i kapasidat pérmití (50%) den  e lokalidat, lo keda menshoná, próksimamente pa minister di hustisia.

Palabranan di gradismentu ta bai na espesialmente nos minister di hustisia, Mr.Quincy Girigorie, pa huntu ku su tim di ministerio di hustisia, GMN  i ekonomia, a evaluá e dokumento di e komishon di un forma krítiko, pa duna nan aprobashon, i pa asina ey di un forma responsabel, reanudá, nos aktividatnan farandulero.

Un danki spesial na miembronan di prensa, ku a sostené, e lucha di e komishon, pa konbensé, nos outoridatnan, ku bida farandulero, ta un pilar ekonómiko importante pa nos pais.

Resumiendo, pues, entrante 19 di yüni próksimo, aktividatnan, manera teatro, fiestanan bailabel ( 50 % di e kapasidat di públiko), i  konsiertonan teniendo na kuenta  ku e distansia sosial, lo por tuma lugar, den klupnan o otro sentronan kultural, será o habrí,  konforme e reglanan stipulá.

Ta bon pa menshoná, ku Meo i otro instansianan  lo kontrolá, i si konstatá violashon di e reglanan, e persona(nan) responsabel, lo keda sankshoná.

Outoridatnan lo vigilá pues  durante e 2 simannan benidero, si tur esnan envolví, ta kumpli, pa por yega na suavisashon di e reglanan.

Finalmente Amak ta sumamente agradesido, pa e aporte di tur e miembronan di e komishon, ku ta konsistí di músikonan i demas aktornan farandulero, ku a duna un aporte signifikante pa por a logra yega na reanudashon di nos bida farandulero.

Músika  ta biba den e sanger kurasoleño, i e paso aki, lo trese un sentimentu di alegria, pas i trankildat den e henter komunidat.

Ban demostrá, ku huntu, nos por keda mantené Cocid -19, leu for di nos fronteranan.

Na  nòmber di e komishon, “Na interes di Farádula

Manfred Feko Gomes                                   Giovanni Atalita